VOV4.Bahnar - Pơ gê 27/1, tơ̆ anih jang pơm trong gre kơ dâu hrĕnh Bắc - Nam jăl Mai Sơn – Trong gre 45, Anih tơm vei lăng trong nơ năm pơ gơ̆r tơ lĕch tơ drong pơ jei băl “Pơ yan Puih mak Nhâm Dần tơ̆ dôm tơ drong jang pơm trong gre”, đei tơ lĕch tơ̆ đĭ đăng tơ drong jang gĭt kăl kơ tĕh đak đơ̆ng Anih tơm vei lăng trong nơ năm.

Tơ drong jang pơm trong gre kơ dâu hrĕnh Bắc – Nam ‘nŏh jĭ tơ drong jang tơm kơ tĕh đak, đei bơ̆ jang 2 jăl. Đơ̆ng rŏng kơ jang đang, đĭ đăng jăl trong âu gô jing trong yak gĭt kăl, tơ ƀưh dôm tơ ring jang mŭk drăm tơm, vang sơng iŏk jên tơ mât jang păng iŏk yoa đĭ đăng tơ drong ‘lơ̆ng đơ̆ng rim tơ ring.

Mĭnh jơ hngâm hơ nhăk tơ drong jang jang kĕh trŏ khei ‘năr hơ găt ‘nŏh jĭ tơ drong hơ pơi ‘mĕh păng đon pơ hnŏng atŭm đơ̆ng dôm bơ ngai jang tơ drong jang ‘nâu. Anih vei lăng tơ drong jang Thăng Long, dôm anih jang roi tơ ƀôh, dăr lăng păng iŏk jang pơ kăp jang nơ̆r tơ drong pơ jei băl păng jang kĕh dôm tơ drong jang kăl vă jăh tơ mât yoa hrôih, hơ nhăk tơ drong đei yoa ‘lơ̆ng đơ̆ng tơ mât jên jang.

Dơ̆ng: Tơ blơ̆