VOV4.Bahnar - Khul jang chĕh phe Buôn Ma Thuột oei vă tơ lĕch Tơ drong thi Hơ drĕng chĕh phe Việt Nam – sơ năm 2022. ‘Nâu jĭ ‘măng mă blŭng tơ drong thi đei pơ gơ̆r, hơ mĕng gô jing “anih pơ chơt tôch hơ iă” ăn dôm bơ ngai jang hơ drĕng chĕh phe, tơ gop pơm hơ tŏk tơ drong ‘lơ̆ng ăn chĕh phe hơ drĕng đơ̆ng Việt Nam. Tơ drong thi Hơ drĕng chĕh phe Việt Nam – sơ năm 2022 vă pơ gơ̆r ƀât blŭng khei 10/2022. Bơ ngai thi ‘nŏh jĭ kon pơ lei Việt Nam  đơ̆ng 18 sơ năm tŏk tơ̆ kơ pal, oei arih xa, bơ̆ jang lơ̆m tĕh đak Việt Nam.

Tơ drong hơ drĕng chĕh phe roi đunh roi đei lơ bơ ngai tơ rĕk truh

Dôm bơ ngai thi vang thi dôm tơ drong đei: Iŏk găr chĕh phe vă hơ drĕng; pơm juăt hăm kơ măy hơ drĕng; nôp hla ar chih trong hơ drĕch păng kơ ƀang chih găh tơ drong ƀou phu đơ̆ng tơ mam, đang kơ ‘nŏh hơ drĕng… Kiơ̆ đơ̆ng tơ drong thi, Khul jang hơ mĕng gô pơm hơ tŏk đei kơ jă chĕh phe Việt Nam. Truh dang ei, Anih pơ gơ̆r hlôi iŏk đei 31 hla ar chih măt vang thi. Lơ̆m nŏh đei 24 ‘nu bơ ngai thi hơ drô̆, 14 ‘nu bơ ngai thi hơ dai.

Dơ̆ng: Tơ blơ̆