VOV4.Bahnar - Ƀa jĭ ‘long pơ tăm hơ nhăk ăn iŏk yua tơm ăn kon pơ lei jang chŭn mir apŭng Ea Súp, dêh char Dak Lak. Mă lei, tơ mam iŏk tơm đơ̆ng kon pơ lei jang chŭn mir Ea Súp tŏk bŏk đei pơ joă yua kơ yă de tŏk bŏk lanh să păng pơm pơ răm tôch kơ lơ. Kon pơlei jang chŭn mir, rim kơ dră chĕp kơ̆l păng anih jang joăt jang kơ apŭng tŏk bŏk hăt hot bơ̆ jang kiơ̆ dôm trong jang tang găn yă de phă, vei lăng ƀa.

 Hloh 1 giĕng kơ âu, Khŭl jang vei lăng kon pơ lei jang chŭn mir xăh Ea Lê, xăh đei chŭn ƀa xă hloh kơ apŭng Ea Súp, dêh char Dak Lak jing hrăt hrot yua kơ yă de tŏk pran tơ̆ tơ ring. Kiơ̆ kơ yă Trần Lệ Thủy, Phŏ kơ dră khŭl tơ băt, ‘nâu jĭ pơ yan ƀa đei yă de phă kơ tang hloh lơ̆m 6 sơ năm âu ki. Khŭl jang hlôi jang hơ dai hăm Anih jang pơ trŭt choh jang sa, anih vei lăng ‘long pơ tăm apŭng, hơ len lăng tơ drong vă tơ tom pơ tho tơ tă ăn kon pơ lei jang chŭn mir găh dôm trong jang hơ met pơ ‘lơ̆ng mă lăp. Yă Trần Lệ Thủy, yua đơ̆ng yă de lanh hrĕnh, 1,2 ŭnh hnam jang chŭn mir hlôi măh yuă ba oei tam mă đum. 1,2 ŭnh hnam nai chu hŭt hơ chăng ƀa.

Ƀơm yă de tơ̆ ƀa oei tam mă đum ‘noh đe lăng nhen hŭt lê̆ đĕch bơ̆ih. Oei dôm ŭnh hnam mă ƀa vă jê̆ đum, tam mă truh ‘năr yuă ‘noh kŭm yuă hloi. Mă mưh lê̆ ‘noh yă de sư sa pơ goh đĭ. Thoi noh xăh gô ưh kơ đei sa, mă pơ yan tŏ âu ‘noh pơ yan ƀa tơm lơ̆m sơ năm.

Xăh Ea Lê pơ yan ‘nâu, ƀa đĭ pơ tơm đum dreng, glơch glach 2 păh trong năm tơ̆ xăh. Dơ̆ng tơ̆ trong kŭm gơh ƀôh tơ̆ dôm na chŭn ‘noh dôm tơ ƀôt ƀa đĭ đei kro đơ̆ng yă de sa. Đơ̆ng rŏng 1 ‘măng brŏk đơ̆ng năm lăng ƀa, ƀok Nguyễn Đức Thịnh oei tơ̆ thôn 3, xăh Ea Lê tơ treh kơ̆l ưh kơ hiôk yua kơ ƀa đei yă de pơ răm lơ dêh hnang:

Yă de sư sa lơ dêh. ‘Noh ih lăng, tơ̆ chŭn âu jur ‘mơ̆i mă ƀôh đĭ, dêh hnang. ‘Noh nhen dôm tơ ƀôt to ‘noh, đĭ đei kro đĭ bơ̆ih.

Lơ̆m kơ sô̆ dôm ŭnh hnam kon pơ lei athei yuă ƀa hrôih vă pơ jei hăm yă de, ‘nhŏng Hồ Giáp oei tơ̆ thôn 3, đĭ yuă đei 4 sào ƀa lơ̆m akŏp kơ sô̆ hloh 2 hécta kơ ŭnh hnam. ‘Nhŏng Giáp tơ băt, oei 4 sào ‘nâu, pơ yan hơ drol ŭnh hnam iŏk đei 3 tấn 1 puăt ƀa, mă lei pơ yan ‘nâu lăp iŏk đei 2 tấn 1 puăt đĕch. Pơ yan hơ drol, ŭnh hnam iŏk pơ đĭ bơ̆n hơ nong vă rong kơ pô, mă lei pơ yan ‘nâu hơ nong athei soh hŭt:

Năr ‘nâu yuă, tơ dăh gơ măng ‘nâu ưh kơ ‘mi ‘noh ‘năr dơ ning gô soh đĭ. Soh đei ‘noh ‘lơ̆ng yua kơ dôm kơ tăp yă de gô đôh đĭ. Oei mưh ưh ‘noh, lê̆ truh pơ yan đơ̆ng sư gô chek lar hrenh dêh.

Pơ yan yuă ƀa phang 2021-2022 tơ̆ Ea Súp pơ tơm hăm dôm chŭn na athei yuă pơ jei hăm yă de

Kiơ̆ kơ Anih vei lăng ‘long pơ tăm apŭng Ea Súp, mưh dang 6 sơ năm, yă de phă ƀa gô đei ƀôh 1 ‘măng lơ̆m dôm tơ ring pơ tăm ƀa kơ apŭng, mă lei pơ yan ‘nâu yă de phă dêh hloh kơ dôm sơ năm hơ drol. Mă loi ‘noh jĭ tơ̆ kơ dơ chŭn 1, xăh Ea Lê, anih jang hlôi chih iŏk lơ na chŭn đei kro yă de sa, akŏp đĭ đăng să hloh 20 rơ bâu mét vuông. Kiơ̆ kơ ƀok Nguyễn Văn Thủy, kơ dră vei lăng anih jang, vă tang găn hơ mơt kơ yă de sa lanh să, ƀơm ưh kơ ‘lơ̆ng truh pơ yan jang truh âu kơnh, anih jang hlôi hơ tŏk loi dơ̆ng tơ roi tơ băt dôm trong jang ki thuơ̆t mă lăp. Hơ dai hăm hơ tŏk loi dơ̆ng dăr hơ len anih tĕch mơ dro pơ gang vei lăng ‘long pơ tăm, veh ver tơ drong iŏk yua hơ tŏk kơ jă, pơm dơ̆ng mơ mat ăn kon pơ lei jang chŭn mir:

Mĭnh ƀar teh chŭn na đei yă de sa, mă lei lăp oei pă 2,3 năr dơ̆ng ‘noh jĭ yuă ‘noh nhôn tơ tă kơ kon pơ lei tơ tĕnh yuă hrôih. Hăm chŭn na hơ yơ ưh kơ gơh yuă ‘noh pơ gơ̆r pruih pơ gang. Mă 2 ‘noh jĭ nhôn  năm tơ̆ anih tĕch pơ gang vei lăng ‘long pơ tăm, tơ tă ăn kơ đĭ đăng ưh kơ gơh hơ tŏk kơ jă ƀơ̆t kơ plăh jĭ thoi âu. Tơ dăh nhôn chă ƀôh hơ nih hơ yơ pơm glăi ‘noh gô apĭnh kơ dră kơ pal sek phak tơ păt.

Ea Súp jĭ apŭng pơm tơ lĕch ƀa să hloh Dak Lak, hăm 8 rơ bâu hlak tar lơ̆m pơ yan ƀa phang âu. Yua đơ̆ng dơ nâu đak ‘lơ̆ng, lơ kon pơ lei jang chŭn mir lơ̆m apŭng jang 3 pơ yan ƀa 1 sơ năm, khei ‘năr hơ tăih băl tôch kơ đeh. Thim lơ̆m noh dơ̆ng, tŏ ‘mi kial sơ năm ‘nâu tơ̆ Ea Súp tôch pha, hăm hơ yuh tơ jur, ưh kơ gan tŏ, ‘mi lơ hloh kơ rim sơ năm. ‘Nâu adoi jing dôm tơ drong tơm pơm hơ tŏk hơ mơt kơ yă de hơ nơ̆ng kơ đei, pơm pơ răm ăn pơ yan jang đơ̆ng rŏng dơ̆ng kơ apŭng. Kon pơ lei jang chŭn mir, khŭl kơ dră rim tơ ring păng rim anih jang joăt jang tơ̆ apŭng tŏk bŏk hơ nơ̆ng dôm trong jang mă lăp vă jăh tang găn yă de, vei sơ đơ̆ng iŏk yua ‘lơ̆ng ăn tơm ƀa - tơ mam iŏk yua tơm đơ̆ng kon pơ lei lơ̆m tơ ring.

VOV Tây Nguyên

Thuem: Tơ blơ̆