VOV4.Bahnar - Kŭm hăm lơ̆m teh đak, kang ƀô̆, khŭl linh tơ̆ tơ ring sơ lam kơ dêh char Dak Nông kŭm tŏk bŏk chơt hơ iă sơng 1 pơ yan puih mak ‘nao. Mă lei chơt hơ iă pơ yan puih mak ưh kơ hiơt hơ năp jang, rim khŭl linh tơ̆ tơ ring sơ lam oei ling lang hơ drin, kơ chăng vă vei lăng tơ drong sơ đơ̆ng ‘lơ̆ng tơ̆ tơ ring sơ lam teh đak.

            Tơ drong sơng Têt Nhâm Dần 2022 tŏk bŏk chơt hơ iă tơ̆ tơ ring sơ lam kơ dêh char Dak Nông, kơ mâu ‘lơ̆ng rŏ pơ yan puih mak tŏk bŏk ƀĕnh ƀang tơ̆ jơ̆p dôm kơ đông linh vei lăng tơ ring sơ lam. Hăm kang ƀô̆, khŭl linh, Kơ đông ‘noh hnam, tơ ring sơ lam ‘noh pơ lei pơ la, sa Têt tơ̆ kơ đông kŭm nhen sa Têt tơ̆ hnam, đei ƀĕng chư̆ng, đei plei ‘long, đei pơ kao, đao, pơ kao cheng reng păng đei jơ năr chơt hơ iă. Sơ năm mă blŭng sơng Têt tơ̆ tơ ring sơ lam, Binh nhất Lầu Văn Hiện, Khŭl phao kơ toang, Kơ đông linh vei lăng tơ ring sơ lam Đắk Tiên, Anih tơm pơ gơ̆r Khŭl linh vei lăng tơ ring sơ lam dêh char Dak Nông tơ băt, tơ drong bơ ngơ̆t truh, pơ lung đơ̆ng kơ dră chĕp kơ̆l kŭm hăm tơ drong hơ met ăn ‘lơ̆ng đơ̆ng Kơ đông vă đei 1 jơ năr Têt hiôk chơ̆t, tơ nŏ hlôi tơ gŭm dôm khŭl linh nhen sư dă ƀiơ̆ kơ ƀlŏk kơ hnam păng kŭm hlôh vao hơ dăh hơ năp jang đơ̆ng kơ dih tơ̆ tơ ring sơ lam kơ teh đak:

        “Sơ năm ‘nâu ‘noh sơ năm mă blŭng oh sơng Têt tơ̆ tơ ring sơ lam. ‘Nhŏng oh lơ̆m Kơ đông kŭm nhen ‘nhŏng oh lơ̆m hnam, pơ ma dơ nuh tôch kơ ‘lơ̆ng păng vang tơ gŭm hăm băl. Oh tôch kơ chơt hơ iă, ‘nă hal kơ dih ‘noh bơ ngai lĭnh. Sơ năm ‘nao đei nơ̆r hmach gơ̆ih truh ŭnh hnam, bôl buăl ‘noh hmach 1 sơ năm ‘nao rim bơ ngai adoi ƀĕnh jơ hngơ̆m pran jăng păng hiôk, hơ nŭk hơ noa.”

        Kiơ̆ đơ̆ng tơ pang ti hơ gei đơ̆ng đe kang ƀô̆, khŭl linh tơ ring sơ lam, dôm ƀĕng chư̆ng hơ bŭl ‘lơ̆ng pơ yua ăn ‘măng sa năr Têt hlôi pơm đang. Tơ mam sa nai ‘noh chă pơm kơ dih, pơ găr đei rong, pơ tăm, ling lang rơ goh ‘lơ̆ng păng pơm lăp tôm ‘meh vă pơ yua ăn Têt. Thiếu tá Lương Văn Phú, Chính trị viên phŏ Kơ đông linh vei lăng tơ ring sơ lam Đắk Tiên, Anih tơưm pơ gơ̆r khŭl linh dêh char Dak Nông tơ băt, anih jang hlôi jang đang ‘lơ̆ng tơ drong jang đon tơ chĕng păng kang ƀô̆, khŭl linh adoi sơ đơ̆ng chơt hơ iă pơ yan puih mak, sơng têt:

        “Jơ hngơ̆m đon đơ̆ng rim khŭl linh dang ei tă kơ chhôk ‘nă, păng hlôi hơ met ăn rim tơ mam vă vei sơ đơ̆ng sơng Têt. Đe sư hlôi băt hơ dăh đon tơ chĕng vă jang kiơ̆ rim hơ năp jang đei pơ jao.”

Kang ƀô̆ khŭl linh Kơ đông linh vei lăng tơ ring sơ lam Đắk Tiên, Anih tơm pơ gơ̆r Khŭl linh vei lăng tơ ring sơ lam dêh char Dak Nông dăr joang, vei lăng trong sơ lam, jrăng sơ lam năr Têt

        Kŭm nhen lơ Têt nai, Têt Nhâm Dần 2022 âu kơ khŭl linh vei lăng tơ ring sơ lam Dak Nông, hơ dai hăm mâm por sŏng hnam linh, ling lang đei phao. Dôm khŭl vei lăng tơ ring sơ lam bsơng têt, chơt hơ iă pơ yan puih mak hai, lăp mơ̆ng rim tơ drong đơ̆ng tơ ring sơ lam hai, ling lang iŏk jang hơ năp jang. Roi vă jê̆ Têt ‘noh tơ drong jang dăr joang, vei lăng đơ̆ng rim kơ dông linh roi đei hơ drin tơ lĕch jang. Rim hơ năp jang vei lăng tơ drong pơm tơm oei đei pơ gơ̆r hơ nơ̆ng. Kơ sô̆ inh kơ rim Kơ đông ling lang bơ̆ jang păng khŏm jang kiơ̆ rim hơ năp jang đei pơ jao. Tơ drong dăr joang, vei lăng bơ ngai, gre mơ̆t lĕch lơ̆m tơ ring sơ lam đei bơ̆ jang kiơ̆ ‘lơ̆ng, vă tơ gop vei lăng kơ jăp trong sơ lam, jrăng sơ lam păng tơ drong pơm tơm tơ ring sơ lam teh đak păng hơ dai hăm tang găn jĭ Covid-19 mĭnh trong đei yua ‘lơ̆ng. Trung tá Nguyễn Huy Hiếu, Kơ dră vei lăng Kơ đông linh vei lăng tơ ring sơ lam Đắk Tiên, Anih tơm pơ gơ̆r khŭl linh vei lăng tơ ring sơ lam dêh char Dak Nông tơ băt:

“Đei Đảng, teh đak, kon pơ lei pơ jao hơ năp jang vei lăng tơ ring sơ lam teh đak, apĭnh pơ kăp gô jang kiơ̆ ‘lơ̆ng hơ năp jang, pơ gơ̆r vei lăng kơ jăp tơ ring sơ lam, băt hơ dăh tơ drong, jang hơ dai hăm rim khŭl linh vă iung jang đei yua dôm kơ loăi pơm glăi, hơ drin jang đang ‘lơ̆ng hloh hơ năp jang lơ̆m ‘măng Têt.”

Jang hơ dai rim khŭl linh tơ̆ tơ ring sơ lam Dak Nông vei lăng trong sơ lam, jrăng sơ lam

        Dêh char Dak Nông đei trong sơ lam kơ jung dang 141km năm klĕch  7 xăh sơ lam kơ 4 apŭng ‘noh Cư Jút, Đắk Mil, Đắk Song păng Tuy Đức. Tơ̆ đĭ đăng rim pơ lei pơ la kơ 7 xăh sơ lam âu adoi hlôi pơ jing dôm grŭp chă vei lăng kơ dih trong sơ lam, jrăng sơ lam. Dôm sơ năm âu ki, mă loi ‘noh jĭ lơ̆m dôm năr Têt, tơ drong jang hơ dai đơ̆ng khŭl vei lăng tơ ring sơ lam hăm dôm grŭp chă vei lăng kơ dih kơ pơ lei, dôm grŭp kon pơ lei, linh chă vei lăng kơ dih kơ xăh hlôi hơ tŏk đei yua lơ̆m tơ drong dăr joang, vei lăng, tang găn kơ dâu klĕnh tơ̆ teh đak đe, mơ̆t glăi đơ̆ng teh đak đe, iung jang tang găn đei yua dôm tơ drong jang pơm glăi tơ̆ trong sơ lam teh đak. Đại tá Nguyễn Văn Lư, Kơ dră vei lăng Anih pơ gơ̆r khŭl linh vei lăng tơ ring sơ lam dêh char Dak Nông, tơ băt, kŭm hăm pơ jing tơ drong jang tang găn sơ đơ̆ng lơ̆m kon pơ lei, tơ ring sơ lam dêh char kŭm hlôi jang kiơ̆ ‘lơ̆ng tơ drong jang tơ bôl tơ ring sơ lam. Mă loi ‘noh, lơ̆m khei ‘năr jĭ  Covid-19 oei tôch krê hơ mơt, tơ drong jang tơ bôl tơ ring sơ lam hlôi đei dôm trong jang tơ plih mă lăp, đei iŏk yua. Kiơ̆ đơ̆ng noh, tơ gop hơ tŏk jơ hngơ̆m đon tơ goăt tơ goăl tơ bôl 2 teh đak, vei kơ jăp tơ ring sơ lam kơ teh đak.

        “Lơ̆m khei ‘năr păh đei jĭ hơ buh ‘noh nhôn athei tơ plih trong jang tơ bôl ‘nao, ưh kơ gơh tơ ƀơ̆p kơ tă ‘noh nhôn kiơ̆ kơ thơ pơ ma dơ nuh, kiơ̆ trong krao điên thoăi kăl păng pơ kă tơ ƀơ̆p băl tơ̆ tơ ring sơ lam. Gơh tơ roi, hăm dôm trong jang, tơ plih trong jang ‘noh nhôn oei pơ vei đei tơ drong tơ roi tơ băt păng jang hơ dai lơ̆m tơ drong jang vei lăng tơ drong pơm tơm hơ găt teh păng vei sơ đơ̆ng tơ ring sơ lam kơ rim pang.”

       Tơ drong ‘lơ̆ng, kơ chăng lơ̆m jang kiơ̆ dôm hơ năp jang đơ̆ng khŭl linh vei lăng tơ ring sơ lam tơ̆ Đắk Nông hlôi păng tŏk bŏk tơ gop gĭt kăl vă vei sơ đơ̆ng tơ pôl lơ̆m tơ ring sơ lam kơ dêh char. Mă loi ‘noh jĭ lơ̆m năr Têt âu, tơ drong kơ jăp ‘lơ̆ng đơ̆ng đe sư hlôi hơ nhăk truh tơ drong sơ đơ̆ng ‘lơ̆ng ăn kon pơ lei sơng sa Têt.

            Công Bắc: Chih

Thuem: Tơ blơ̆