Tơ̆ Hop akŏm, lơ nơ̆r tơgop akhan, kon jên jang kơ  Tơdrong jang tơm teh đak atŏk tơ iung mŭk drăm-tơpôl tơring kon kông păng groi kông jăl jang 2021- 2025 tim mă đei Trung ương tơbăt kơna lơ dêh char tơƀơ̆p tơnap tap lơ̆m tơ iung pơjing trong pơ prŏ jang iŏk yua kon jên jang.

Mĭnh ƀar hơnih jang pơjao pơm tơm rim tơdrong vă jang, mă lei tim mă iung jang tơdrong jang pơjing trong pơprŏ jang, pơtho tơbăt jang kiơ̆ păng chih akŏm dôm jang kơ tơdrong vă jang ... Hơnih vei lăng kon pơlei rim apŭng jang kiơ̆ Tơdrong jang au oei mơ suơ̆l mơsoăl lơ̆m chă tơchĕng, tơlĕch jang kiơ̆ rim hla bơar pơtho tơbăt đơ̆ng Trung ương păng dêh char, tim mă đei trong jang kăl vă tơplih trong iung jang.

Lơ̆m sơnăm 2022, đĭ đăng apŭng hơmet ăn kon jên jang apŭng vă iung jang Tơdrong jang au. Ƀok Trần Văn Mẫn, Kơcdră chĕp pơgơ̆r Hơnih vei lăng kon kông dêh char Quảng Nam akhan, Tơdrong vă jang 9 kơ Tơbăt dih băl trong jang ‘lơ̆ng lơ̆m jang kiơ̆ Tơdrong jang tơm teh đak atŏk tơ iung mŭk drăm-tơpôl tơring kon kông păng groi kông găh “Tơmơ̆t jên jang atŏk tơ iung khul kon kông kơ toei bơngai păng khul kon kông oei lơ tơdrong tơnap tap” tim mă đei pơtho tơbăt hơdăh găh trong jang ăn tŏk iŏk, tơdrong pơkăp tŏk iŏk, khei ‘năr tŏk iŏk păng kon jên cheh hăm tơgŭm djru rim ŭnh hnam kon kông oei tơnap tap. Hrei au, dêh char Quảng Nam đei lơ kon jên jang mă lei iung jang ưh kơ gơh.“Nhôn athei, trong ăn tŏk iŏk au jei gơ̆h jang kiơ̆ dơ̆ng pang ăn Hơnih mong jên Tơgŭm tơpôl ăn tŏk iŏk. Nhen lĕkơdră chĕp pơgơ̆r rim tơring hrei au tŏk bŏk jang, pơ pơprŏ ăn kon jên, dơ̆ng pang tang măt hăm Hơnih mong jên Tơpôl ăn tŏk iŏk. Găh bơngai ăn tŏk iŏk jei lơ, pơjing rơvơn ăn atŏk tơ iung.”

Đei ƀơm truh jang kiơ̆ Tơdrong vă jang 1 “Tơgŭm djru xek tơlang tơdrong ưh kơ măh teh oei, hnam oei, teh jang sa, đak sŏ nhă” găh Tơdrong jang teh đak lơ̆m atok tơ iung mŭk drăm-tơpôl tơring kon kông păng groi kông, ƀok Trường Trung Tuyến, Kơ iĕng Kơdră chĕp pơgơ̆r Hơnih vei lăng Kon kông dêh char Gia Lai pơma hơdăh: Sơnăm 2022, rim tơring lơ̆m Tơdrong jang hlôi kĭ pơkăp hla bơar hơnăn dôm ŭnh hnam dơnuh đei tơgŭm ăn hnam oei. Lơ̆m mă noh, rim ŭnh hnam kon pơlei au đei tơgŭm ăn tŏk iŏk jên đơ̆ng hơnih mong jên vă pơm hnam oei. Truh blŭng sơnăm 2023, lơ unh hnam găh khul tơgum ăn pă đei lơ̆m hơnăn ŭnh hnam dơnuh bơih kơna hrei au oei tim mă sơng iŏk đei tơgŭm djru hnam oei. Ƀok Trường Trung Tuyến tơbăt, tơring tôch mơsuơ̆l mơsoăl lơ̆m xek tơlang tơlĕch kon jên tơgŭm djru ăn kon pơlei:“Dang ei, đe sư hlôi tŏk iŏk jên bơih, găh bơ̆n chuơ̆h xi măng oei hre, dang ei oei tơ hlăk ƀơ̆t dau kơna mơmat dêh. Nhôn hlôi chih pơtruh hla bơar ăn Hơnih vei lăng kon kông vă đei nơ̆r tơl hơdăh ăn tơring.”

Tơ̆ au, tang măt rim tơring tơbăt dih băl trong jang hơ iă păng tơbăt hơdăh dôm tơdrong jang tim mă ‘lơng, tơhlăk tơhlĭn lơ̆m tơlĕch jang kiơ̆ rim Tơdrong jang Teh đak atŏk tơ iung mŭk drăm-tơpôl tơring kon kông păng groi kông. Vă atŏk tơ iung Tơdrong jang au đei jơnei hơ iă, ƀok Hầu A Lềnh, Ƀô̆ trơng-Kơdră chĕp pơgơ̆r Hơnih bơ̆ jang vei lăng kon kông athei rim hơnih bơ̆ jang, tơring tơrang chă tơchĕng hơlen mă hơdăh lơ̆m bơ̆ jang pơchŏh trong ăn Hơnih vei lăng kon pơlei dêh char tơlĕch jang kiơ̆:“Bơ̆n kăl pơtho tơbăt mă hơdăh ăn khul kơdră apŭng, tơring. Dôm tơdrong yă kiơ găh lơ̆m dêh char ‘nŏh dêh char xek tơlang, ưh kơngê̆ gô chang Trung ương. Rim tơring kăl atŏk kơtang jang hơdoi, tơbăt dih băl kơtơ̆ng ang, trong jang hơ iă. Athei Hơnih bơ̆ jang vei lăng kon kông rim dêh char jĭ hơnih pơm tơm tơ̆ tơring kăl băt hơdăh, rim khei tơroi tơbăt ăn dôm tơdrong jang kiơ̆ keh đang lơ liơ, tơhlăk tơhlĭn, tơnap tap lơ liơ…”.

Jơ ‘năr au, ƀok Hầu A Lềnh, Ƀô̆ trơng-Kơdră chĕp pơgơ̆r Hơnih bơ̆ jang vei lăng kon kông ‘nao chĕp kơ̆l Khŭl bơ̆ jang kơ Hơnih bơ̆ jang vei lăng kon kông hlôi bơ̆ jang hăm dêh char Quảng Ngãi găh pơtôch jang kiơ̆ Tơdrong jang Teh đak atŏk tơ iung mŭk drăm-tơpôl tơring kon kông păng groi kông sơnăm 2022 păng 3 khei blŭng sơnăm 2023. Kiơ̆ tơbăt, kon jên tơlĕch jang kơ tơdrong jang au lơ̆m dêh char ‘nau lơ̆m sơnăm 2022 lăp đei 49%; sơnăm 2023, ‘nao lăp tơlĕch vă jê̆ 5%. Iung pơma tơ̆ jơ bơ̆ jang ƀok Hầu A Lềnh pơchŏh trong mĭnh ƀar tơdrong vă tơgŭm ăn dêh char Quảng Ngãi tơlĕch jang kiơ̆ jơnei Tơdrong jang au:“Tơring bơ̆n tôch kơ să, hơtăih hơtŏ. Khŭl bơngai vă tơgŭm djru ‘noh lơ kơna tôch mơmat tat. Tơdrong vă jang kơ bơ̆n hăp pha hăm rim trong vă jang anai kơna kăl chă pơjao jang kiơ̆ tơring. ‘Nau jing tơdrong jang kăl kơna kăl đei iung jang hơdoi vă tơlĕch jang kiơ̆. Tơdrong iung jang hơdoi au kăl jang kiơ̆ rim tơdrong pơkăp bơ̆ jang ƀar păh rim hơnih bơ̆ jang vă pơjing đei trong vă jang trŏ lăp, hơmet pơ ‘lơ̆ng tơdrong tơhlăk tơhlĭn ‘lơ̆ng hơ iă”.

Khul bơ̆ jang kơ Hơnih bơ̆ jang vei lăng kon kông gô akŏm pơtruh ăn Khŭl kơdră Teh đak păng rim hơnih tơm, hơnih jang lăng hơlen, pơjing trong jang hơmet pơ ‘lơ̆ng tơnap tap, tơhlăk tơhlĭn lơ̆m tơlĕch jang kiơ̆ Tơdrong jang teh đak atok tơ iung mŭk drăm-tơpôl tơring kon kông păng groi kông.