‘Măng âu, Anih jang đoàn dêh char Dak Lak pơgơ̆r khăm jĭ, asong pơgang păng roi tơƀôh jơhngơ̆m pran ăn kơ hrĕng kon pơlei, asong dôm jĭt tơpu tơmam ăn kơ ŭnh hnam teh đak tơgŭm, tơlĕch jang min man 1 pôm hnam ‘mêm mơnat, pơjao 3 tŏ hnam ‘mêm mơnat ăn kơ ŭnh hnam hơdruh tơdăm iung jang sơ̆; pơgơ̆r đă ƀŏng lŏng tơplŏng kơdâu, hơri hơsoang hơdai hăm tơlĕch jang ‘măng pơlong kơkuh chơt hơiă Hop akŏm Đoàn hơdruh tơdăm Cộng sản Hồ Chí Minh lơ̆m teh đak ‘măng mă 12.

Mŏ H Giang Niê, Bí thư Anih jang đoàn dêh char Dak Lak tơbăt, akŏp jên bơ̆ jang kiơ̆ tơdrong jang ‘noh jĭ 250 triệu hlak jên. ‘Nâu jĭ tơdrong hơdrin đơ̆ng khŭl jang đoàn lơ̆m tơdrong hơvơn dôm kon jên lăng găh tơring, mă loi ‘noh jĭ lơ̆m tơdrong teh đak ‘nao yak hloh jĭ hơbuh pơm ăn dôm tơdrong mŭk drăm, pơm tơlĕch tĕch mơdro tă kơ tơƀơ̆p lơ mơ mat tat.