Ƀlŏk hơdơ̆r nơ̆r pơtho đơ̆ng Ƀok Hô “Tơ̆ yơ vă hơdruh tơdăm năm hloi, đei tơdrong kiơ tơnap đei hơdruh tơdăm”, đảng viên Trần Tiến (rơneh sơnăm 1992), bơngai joăt jang Hơnih bơ̆ jang vei lăng kon jên-Hla bơar chih hơlen, Kơtheh, ƀao hiêm Tơpôl dêh char Dak Lăk hlôi pơchoh trong, pơgơ̆r rim tơdrong jang hơdruh tơdăm lăng truh rim tơring kăl lơ̆m dêh char. ‘Nhŏng lơ ‘măng tơgoăt pơgơ̆r dôm pơgơ̆r tơgop vei răk tơƀăk mong, lang să tơdrong ‘lơ̆ng rŏ oei sa joh ayŏ rim hơdrung kon kông nhen: ming hơmet hơdrơ̆m đak, pơm hơtŏk jơhngơ̆m đon hlôh vao vei lăng năng tông rơgoh cham char ăn kon pơlei; pôk tơmam drăm, tơgŭm djru kon jên pơtho tôn chĭng chêng lơ̆m tơring sơlam teh đak.

Atŭm hăm ‘noh, ‘nhŏng Tiến hlôi chă hŏk pơhrăm, atŏk kơtang iung jang kiơ̆ tơplih kơsô̆ lơ̆m bơ̆ jang tơdrong jang kơdih, đei lơ trong jang ‘nao, pơjing rơvơn lơ̆m tơdrong jang găh ƀao hiêm tơpôl. Đảng viên Trần Tiến tơbăt:“Ba jĭ bơngai đang viên sơnăm mơlôh, jei đei chi ƀô̆ pơjing rơvơn hơnơ̆ng iŏk chih tơlĕch mĭnh ƀar tơdrong ou to ăn hop akŏm, đei rơvơn hơlen kơtang hloh dơ̆ng găh tơdrong hok pơhrăm păng pơm kiơ̆ Ƀok Hô. Ba hơnơ̆ng hơdrin đĭ ai kơ yuơ tơdrong bơ̆ jang tơpôl, lơ̆m bơ̆ jang tơdrong jang 'noh ba hŏk pơhrăm kiơ̆ Ƀok Hô lơ hloh ‘noh hơdrin hŏk pơhrăm kơdih, ling lang hŏk pơhrăm đơ̆ng bôl boăl vă tơdrong jang bơ̆ ‘lơ̆ng hơ iă hloh dơ̆ng”.

   Hăm mŏ Nguyễn Thùy Trang, rơneh sơnăm 1992, Bí thư Đoàn phương Ea Tam, pơlei tơm Buôn Ma Thuột, mă đơ̆ng sơnăm ‘lŏ lơ liơ, kơchư̆k jang yă kiơ, mŏ jei ƀôh hơdăh hơnăp jang, sơnong jang kơ bơngai kang ƀô̆. 23 sơnăm hlôi pơm Kơ iĕng Kơdră chĕp pơgơ̆r Hơnih bơ̆ jang Mặt trận Tổ quốc phương sơnăm mơlôh hloh tơ̆ Dak Lăk. Đơ̆ng mă mơ̆t bơ̆ jang lơ̆m Đoàn, mŏ hlôi tơlĕch jang tơ iung pơjing 7 tơdrong jang hơdruh tơdăm, pơgơ̆r lơ tơdrong jang pơ yoa ăn tơdrong oei sa tơpôl, iung jang kơtang chă pơrô̆ hơvơn hơdruh tơdăm năm pơm ƀô̆ đô̆i, tơgŭm djru hơdruh tơdăm pơjing tơdrong jang, pơrô̆ hơvơn hơdruh tơdăm vang iung jang rim tơdrong jang vei răk tơƀăk mong păng atŏk tơ iung tơdrong oei sa joăt joe sơ̆ ki ‘lơ̆ng kơ hiă kơ rim hơdrĕch hơdrung. Đơ̆ng noh, pơjing đei tơdrong tơgoăt, atŏk kơtang hơnăp jang kơ hơdruh tơdăm lơ̆m tơring. Mŏ Nguyễn Thùy Trang tơbăt:“Hloh đơ̆ng ‘măng pơrô̆ adoi nhen hơlen tơchă băt găh Ƀok Hô ‘noh ba hŏk pơhrăm kiơ̆ tơdrong oei sa ‘lơ̆ng, pơnam, hơdrin păng hơnơ̆ng pơm hơtŏk jơhngơ̆m đon jang tơnăp dôm tơdrong kơdră pơjao ăn. Pơm kiơ̆ kơjăp oei sa ‘lơ̆ng, tơpăt păng ‘moi kiơ̆ ƀlep trong pơkăp kơ hơnih jang vă pơjing đei trong jang ‘lơ̆ng hơ iă ƀar păh Đang hăm kon pơlei păng lơ̆m kang ƀô̆ hăm đoàn viên, hơdruh tơdăm”.

Hôn bơnê dôm tơdrong tơgop đơ̆ng dôm đang viên sơnăm mơlôh, ou ki, Hơnih Đoàn dêh char Dak Lăk hlôi pơgơ̆r pôk pơ ư 33 ‘nu đang viên sơnăm mơlôh gơ̆h hơgei kơ rim apŭng, thĭ xah, pơlei tơm păng rim hơnih jang lơ̆m dêh char. ‘Nou dôm bơngai ‘lơ̆ng gơh hơgei lơ̆m lơ tơdrong nhen: Hŏk pơhrăm-tơchĕng hơlen khoa hŏk, atok tơ iung mŭk drăm-pơjing tơdrong jang, bơ̆ jang đoàn-khul, vei lăng sơđơ̆ng teh đak-sơđơ̆ng tơring, tơ iung pơjing tơring tơrang ‘nao păng vei lăng cham char. Đei pôk pơ ư ‘măng mă ou, mŏ Phạm Thị Thu Thảo, Bí thư Đoàn hnam trương Jăl pêng Buôn Hồ, Thĭ xah Buôn Hồ, dêh char Dak Lăk tơbăt:“Ba tôch chhôk hơ iă ‘nă hal, lơ̆m chăl atŏk tơ iung ou hăm kơdih ba ‘noh đang viên sơnăm mơlôh, mĭnh ‘nu kơdră chĕp pơgơ̆r đoàn kơna ba ƀôh hơnăp jang kơ ba gô jing bơngai kăl hloh vă vang tơgŭm ăn teh đak roi năr roi atŏk tơ iung hloh dơ̆ng”.

          “Tơ̆ yơ vă hơdruh tơdăm năm hloi, đei tơdrong kiơ tơnap đei hơdruh tơdăm”-nơ̆r pơtho khan đơ̆ng Ƀok Hô đơ̆ng sơ̆ hlôi jing trong kăl hloh ăn lơ đang viên sơnăm mơlôh lơ̆m jăl trong plang ăn jơhngơ̆m đon kơdih. Tơ̆ Dak Lăk, dôm đang viên nhen Trần Tiến, Nguyễn Thùy Trang dăh mă Phạm Thị Thu Thảo hlôi păng tŏk bŏk sơkơ̆t hơdăh hơnăp jang pơm jŭk yŭk trong hơlou lơ̆m rim tơdrong jang, đơ̆ng tơdrong bơ̆ jang truh tơdrong pơgơ̆r Đoàn, đơ̆ng vei răk tơƀăk mong tơdrong oei sa joăt joe ‘lơ̆ng rŏ sơ̆ ki truh tơplih kơsô̆ tơgŭm ăn kon pơlei. Đe sư ưh khan lăp hŏk pơhrăm kiơ̆ Ƀok Hô lơ̆m găh hơnăp jang, hŏk pơhrăm kơdih păng oei sa ‘lơ̆ng hơ iă, mă oei pơm ăn dôm tơdrong ‘lơ̆ng hơ iă ‘noh jing tơdrong jang hơdăh, tơpă, lang să jơhngơ̆m đon oei sa ‘lơ̆ng-hơrih sa đei iŏk yoa ăn tơpôl kon pơlei pơla.     

Bơ̆ jang hôn bơnê đang viên sơnăm mơlôh gơ̆h hơgei jing jơ ‘năr vă Hơnih Đoàn dêh char Dak Lăk hơnơ̆ng pơm hơtŏk jơhgơ̆m đon iung jang plang ăn tơdrong hơgei, kơrŭn đĭ ai lơ̆m đoàn viên, hơdruh tơdăm; tơgop tơ iung pơjing hơnih Đoàn pran kơjăp, atŏk kơtang hơnăp jang kơ jơhnơr mơlôh lơ̆m tơdrong jang tơ iung pơjing păng vei lăng teh đak. Tơ iung pơjing Dak Lăk roi năr roi atŏk tơ iung, gơ̆h hơgei.