Mĭnh pơgê tơ̆ thôn 1, xăh Krông Ana. Tơ̆ hơla hnam pơtăm xă dôm jĭt mét, ‘nhŏng Dương Huỳnh Linh kŭm hăm hơkăn oei plơ̆ hơnong, u hơmet hơnong vă pơtăm pơmâu ‘nao. Ƀou hơnong păr ƀĕnh hnam pơtăm. ‘Nhŏng Linh hlôi pơtăm pơmâu đei 14 sơnăm bơih, đơ̆ng 1,2 anih jang iĕ blŭng a, dang ei trong jang đơ̆ng ‘nhŏng Linh ưh lăp hơnhăk ba iŏk yoa sơđơ̆ng đĕch mă oei chă tơdrong jang hơnơ̆ng ăn dôm jĭt ‘nu bơngai jang tơ̆ tơring. Tơdrong iung jang xa đơ̆ng ‘nhŏng hlôi pơm ăn lơ unh hnam kon pơlei tơplih ming đon tơchĕng – rơih iŏk trong choh jang xa rơgoh, ưh đei hiong huach mă lei đei yoa lơ: “Đĭ đăng hnam nhôn đơ̆ng ƀok yă, kơtum kơtŏng adoi jang tŏk đơ̆ng pơtăm pơmâu. Sơ̆ hnam nhôn tơnuh dêh mă lei đơ̆ng pơtăm pơmâu dang ei kŭm măh sŏng xa, đei hơbăn ao hrŭk tơnŏ bơih.”

Kŭm tơ̆ tơring teh ‘nŏh mơ̆n, jơhnơr mơlôh oei jang kiơ̆ trong kơdih păng jang hăm kơmăy kơmŏk ‘nao. Hăm ‘nhŏng Huỳnh Đức Cường, 30 sơnăm, sơ̆ đăi hŏk tơ̆ Hnam Đăi hŏk ki thuơ̆t tơ̆ plt Hồ Chí Minh, tơdrong pơtăm pơmâu ưh lăp rong ‘me tơdrong arih đĕch, mă oei jing 1 trong choh jang xa rơgei ‘lơ̆ng hăm cham char hai, hơtŏk đei kơjă tơmam đơ̆ng choh jang xa tơ̆ tơring hai: “Tơdrong jang ‘nâu chă tơdrong jang ăn mih ma duch nă tơ̆ xăh, mă 2 ‘nŏh hơnhăk ba iŏk yoa kŭm lơ mơ̆n. Pơtih gia nhen hnam nhôn đĕch, 10 tŏ anih pơtăm 1 khei, trư tôm jên jang kŭm hơnhăk ba iŏk yoa đơ̆ng 20 - 30 triu, sư oei gô mơ̆ng đơ̆ng yă pơmâu jur tŏk dơ̆ng. Oh ƀôh tơdrong jang ‘nâu tôch hơmĕng, jĭ 1 trong jang đei yoa ‘lơ̆ng đơ̆ng hơnong ƀa bơ̆n yoă đang tơ̆ chŭn, iŏk pơtăm pơmâu, đang kơ ‘nŏh pơm phŏng tuh ăn cheh phe, tiu, sầu riêng dơ̆ng, sư tôch ‘lơ̆ng.”

Kiơ̆ kơsô̆ chih jô̆ đơ̆ng tơring, đơ̆ng 1,2 unh hnam jang pơlong năng, truh dang ei lơ̆m xăh Krông Ana đĭ đei hlŏh 1.000 anih pơtăm pơmâu jang xa prăt sơnăm, chă tơdrong jang ăn hlŏh 2.000 ‘nu bơngai. Ưh lăp tơgŭm ăn kon pơlei đei iŏk yoa sơđơ̆ng đĕch, tơdrong pơtăm pơmâu oei tơgŭm găn ƀiơ̆ tơdrong sŏh hŭt hơnong ƀa, vei lăng ‘lơ̆ng cham char păng tơgĕch iŏk tôch ai tơmam iă đơ̆ng choh jang xa.

Ƀok Huỳnh Đức Phúc, sơ̆ pơm Kơdră vei lăng Khul jang chŭn mir xăh, ăn tơbăt: “Tơdrong ‘lơ̆ng tơ̆ âu ‘nŏh jĭ tơring pơtăm ƀa tơm tơ̆ Krông Ana, gơnơm đơ̆ng tơring pơtăm ƀa âu mă kon pơlei gơ̆h đei lơ hơnong vă hŏk tơdrong jang pơtăm pơmâu hăm hơnong ƀa, chă trong jang tŏk. Jô̆ păh lăp 1 unh hnam đei tŏ sĕt hlŏh ‘nŏh 2 anih pơtăm pơmâu, đei hnam truh 10 anih, 20 anih pơtăm. Kon pơlei jang chŭn mir lui kiơ̆ tơdrong jang pơtăm pơmâu hăm hơnong ƀa âu. Mă 1 ‘nŏh jĭ choh jang xa rơgoh, tơdrong tĕch tơmam đơ̆ng kon pơlei jang đei tôch ƀônh hlot.”

Đơ̆ng dôm kơchô̆ hơnong ƀa đơ̆ng rŏng kơ pơyan yoă, kon pơlei Krông Ana, dêh char Đắk Lắk hlôi pơjing đei 1 trong jang kơjăp ‘lơ̆ng; pơm ăn hơnong ƀa roi đei yoa, jing trong jang mŭk drăm rơgŏh ‘lơ̆ng.