Tơ̆ jơ tơƀâp, 2 ‘nu kơdră chĕp kơ̆l pơma hơdăh tơdrong gĭt kăl đơ̆ng hơtŏk hlŏh dơ̆ng dôm tơdrong jang hơdoi găh khul linh, vei sơđơ̆ng teh đak păng jang tơbôl, vă vei kơjăp tơdrong sơđơ̆ng chinh trĭ, sơđơ̆ng teh đak păng tơpôl; năng ‘nâu jĭ 1 lơ̆m dôm tŏ jrăng gĭt kăl lơ̆m tơdrong pơvei kăp gĭt Việt Nam- Lào. 

Ƀar păh pơma hơdăh vă hơnơ̆ng tưk tơiung tôch ai tơdrong đei yoa đơ̆ng dôm trong jang hơdai hrei ‘nâu, atŭm hăm ‘nŏh hơnơ̆ng tơplih ‘nao păng pơm hơtŏk tơdrong ‘lơ̆ng mưh bơ̆ jang lơ̆m rim tơdrong. Kiơ̆ đơ̆ng noh, 2 teh đak vă hơlen năng, pơjing dôm trong jang hơdoi ‘nao mă lăp, vă hơtŏk hlŏh dơ̆ng tơdrong pơvei gĭt kăl Việt Nam- Lào, hơnhăk ba tơdrong đei yoa ‘lơ̆ng ăn kon pơlei 2 teh đak păng vang tơgop ăn tơdrong rơngei, jang hơdoi păng jang tŏk tơ̆  tơring kŭm nhen lơ̆m apŭng plenh teh.