Hăm Đăk Lăk-dêh char găh tŏk bŏk lơ̆m tơring Tây Nguyên, tơdrong tơchơ̆t đei lăng gô pơjing rơvơn hlŏh dơ̆ng atŏk tơ iung tĭh tên, adoi tơlĕch ăn lơ tơdrong long, pơkoel iung jang kơtang hlŏh dơ̆ng lơ̆m khŭl jang chĭnh trĭ.

- Ƀok ăi, Tơdrong tơchơ̆t 23 đơ̆ng Dơnŏ anĭh tơm Chĭnh trĭ tŏkb ŏk pơih trong rơvơn atŏk tơ iung ăn tơring Tây Nguyên. Hăm trong jang kơdĭh kơ Đăk Lăk tơdrong tơchơ̆t gô ba ăn tơdrong hơ mŏ lơ liơ?

- Ƀok Nguyễn Đình Trung: Rŏ năng vă pơma Tơdrong tơchơ̆t 23 đơ̆ng Dơnŏ anih tơm Chĭnh trĭ tơlĕch ăn ‘noh 1 hơyak gĭt kăl hlŏh lơ̆m atok tơ iung mŭk drăm tơpôl sơđơ̆ng dơ̆ng kơjăp tơ̆ Tây Nguyên pơma atum păng Đăk Lăk pơma hơdrô̆. Atŭm hăm tơdrong iung jang ‘nao đei Khŭl kơdră chĕp pơgơ̆r tĕh đak tơlĕch ăn, lơ̆m au pơjing đei 23 tơdrong jang, 9 tơdrong vă jang tơmơ̆t jên jang găh trong nơnăm tơring kơ Tây Nguyên. Đắk Lăk ‘nŏh dêh char găh lơ̆m tơring Tây Nguyên păng jĭng dêh char tŏk bŏk kơ tơring. ‘Nau gô jing hơyak gĭt kăl hlŏh pơ̆ih trong ăn lơ rơvơn ‘nao ăn dêh char Đak Lăk gơ̆h iung jang kiơ̆ jơnei hlŏh dơ̆ng dôm tơdrong đei, yak hlŏh tơnap tap, tơdrong long pơjing đe hơyak ‘nao, pran kơtang hlŏh dơ̆ng lơ̆m atŏk tơ iung mŭk drăm tơpôl, sơđơ̆ng dơ̆ng kơjăp tơring.

Dêh char Đăk Lăk xơkơ̆t hơdăh mĭnh ƀar tơdrong tơnap tap lơ̆m jang kiơ̆ ‘nŏh: tơdrong kơhret lơ̆m pơjei dĭh băl đơ̆ng vang mơ̆t hơdoi jang mŭk drăm lơ̆m mơdro sa tơmam drăm chŏh jang sa. Mă ƀar, khŭl bơngai jang mă đơ̆ng lơ mă lei măt bơngai jang gơ̆h hơgei tim mă lơ. Tơdrong mă pêng, Đăk Lăk oei jing dêh char dơnŭh tim mă kĕ vă pơprŏ ăn kon jên jang, ŭnh hnam dơnŭh lơ̆m tơring kon kông oei lơ, pơm sa roi ư̆h sơđơ̆ng hlŏh dơ̆ng lơ̆m tơdrong erĭh sa tơpôl…

- Mư̆h lei dêh char đei trong jang lơ liơ vă yak hlŏh tơnap tap ‘nŏh, iung jang atŏk kơtang dôm tơdrong kơdĭh đei vă jang kiơ̆ keh đang rim tơdrong tơchơ̆t, hŏ ƀok?

-  Ƀok Nguyễn Đình Trung: Dêh char xơkơ̆t tĕnh koăng tơ iung pơjing păng tơlĕch jang jơ̆p jang tơdrong jang kơ dêh char vă jang kiơ̆ Todrong tơchơ̆t đơ̆ng Dơnŏ anih tơm Chĭnh trĭ, jang kiơ̆ Tơdrong iung jang đơ̆ng Khŭl kơdră Tĕh đak. Mă 2, jang keh đang, pơtrŭh ăn, kĭ tơchơ̆t păng tơlĕch jang kiơ̆ keh đang trong pơprŏ jang dêh char Đăk Lăk jăl jang 2021- 2030 păng lăng trŭh sơnăm 2050. Sơđơ̆ng hăm trong pơprŏ jang Tĕh đak, trong pơprŏ jang hơnĭh bơ̆ jang tĕh đak păng trong pơprŏ jang tơring Tây Nguyên. Mă 3, hơnơ̆ng tơlĕch jang ‘lơ̆ng hlŏh dơ̆ng rim tơdrong đei hrei au. Mă kăl ‘moi kiơ̆ 4 tơdrong tơm ‘nŏh: Atŏk tơ iung rim tơmam drăm chŏh jang sa bri ‘long đei lơ dang ei; atŏk tơ iung jang kmăi kmŏk pơm tơlĕch tơmam drăm chŏh jang sa, ka hơdang păng ŭnh hơyŭh; atŏk tơ iung mŭk drăm tơring kơdrơ̆m, pơnơ̆t đak, muk drăm kơsô̆, tơpôl kơsô̆. Lơ̆m au atŏk tơ iung pơlei tơm Buôn Ma Thuột jing hơnĭh tơm kơ tơring Tây Nguyên kiơ̆ nơ̆r pơkăp đơ̆ng Dơnŏ anĭh tơm Chĭnh trĭ. Adoi, dêh char gô tơlĕch jang kơtang, pơjing đei drơ̆ng mĭnh nơ̆r kơtang lơ̆m hơmet pơ ‘lơ̆ng dôm tơdrong tơhlăk tơhlĭn, atŏk kĕ pơjei, jang kiơ̆ ‘lơ̆ng dôm tơdrong đei lơ̆m tơring. Jang kiơ̆ keh đang rim trong bơ̆ jang vei lăng sơđơ̆ng tơpôl, vei lăng năng tông tơdrong erĭh sa kơ kon pơlei. Mă kăl ‘nŏh rim kon pơlei kon kông, vei lăng sơđơ̆ng lơ̆m tơring.

- Lơ̆m lơ trong atŏk tơ iung kơ Tây Nguyên, tơlĕch jang rim tơdrong vă jang ‘nŏh tôch gĭt kăl. Mă lei tơ̆ lơ dêh char lơ̆m tơring., dôm tơdrong jang tĭh kơtôih ƀơm hê̆ dôm tơdrong ư̆h kơ lăp. Tơ̆ Đăk Lăk tơdrong mă au lơ liơ păng pơm lơ liơ vă jang kiơ̆ keh đang “ rơvơn hlŏh” lơm tơlĕch jang kiơ̆ rim tơdrong vă jang, atŏk tơ iung, jang keh đang ‘lơ̆ng rim trong tơlĕch jang lơ̆m Tơdrong tơchơ̆t 23?

- Ƀok Nguyễn Đình Trung: Vă tơlĕch jang kiơ̆ ‘lơ̆ng kon jên tơmơ̆t jang păng atŏk hlŏh dơ̆ng iŏk đei jơnei rim tơdrong vă jang tơgop lơ̆m jang kiơ̆ keh đang Tơdrong tơchơ̆t đơ̆ng Dơnŏ anĭh tơm Chĭnh trĭ, dêh char Đăk Lăp pơkăp, atŏk kơtang jơhngơ̆m đon lăp dĭh băl lơ̆m tơlĕch jang kiơ̆; sơkơ̆t hơdăh hơnăp jang kơ rim dơnŏ anĭh bơ̆ jang lơ̆m chĕp pơgơ̆r jang kiơ̆. Iung jang kơtang tơlĕch jang kiơ̆ rim tơdrong jang kơ tơring. Adoi hơnơ̆ng iung jang hơdoi kơ jăp hăm rim hơnĭh bơ jang Trung ương, rim dêh char lơ̆m tơlĕch vă tơlĕch jang kiơ̆ rim tơdrong vă jang. Lơ̆m hơvơn kon jên tơmơ̆t jang păng tơlĕch jang kiơ̆ rim tơdrong vă jang lăng kơjăp rim trong tơlĕch jang ‘lơ̆ng chă hơvơn kon jên tơmơ̆t jang lơ̆m tơpôl vă tơmơ̆t jên jang tơ iung pơjing trong nơnăm, tơdrong jang mŭk drăm tơpôl tơm hlŏh. Hơnơ̆ng pơjing keh đang trong bơ̆ jang hơvơn tơmơ̆t jên jang, atŏk kơtang hơmet pơ ‘lơ̆ng trong bơ̆ jang, trong hơvơn tơmơ̆t jên jang, atŏk kơtang bơ̆ jang tĕh đak lơ̆m vei lăng tơmơ̆t jên jang ming man. Jang kiơ̆ kơjăp bơ̆ jang dăr lăng hơlen hăm rim tơdrong jang tơmơ̆t jên jang. Adoi hơmet pơ ‘lơ̆ng tĭh rĭh dôm tơdrong jang ayơ kăl hlŏh ‘nŏh iung jang hơdrol vă pơprŏ kon jên tơmơ̆t jang keh đang hloi tơgop jang keh đang trong tơlĕch jang atŏk tơ iung atŭm kơ tơring Tây Nguyên păng pơđĭ lơ̆m tĕh đak.

- Lei ah, bơnê kơ ih ƀok hơ!