Kơsơ̆ năr 13/10, Hop akŏm tih Đang ƀô̆ Khul kơdră chĕp pơgơ̆r teh đak ‘măng mă blŭng hlôi pơgơ̆r pơtôch. Hop akom tih pơdrơ̆ng kiơ̆ Tơdrong tơchơ̆t hăm 100% ‘nu kơdră tang măt lăp đon. Tơdrong tơchơ̆t Hop akŏm tih tơƀôh hơdăh jơhngơ̆m đon hơpơi, jơhngơ̆m đon hơdrin đĭ ai đơ̆ng Đang ƀô̆ Khul kơdră chĕp pơgơ̆r teh đak jăl ‘nao hăm sơkơ̆t hơdăh "Tơ iung pơjing Đảng ƀô̆ Khul kơdră chĕp pơgơ̆r Teh đak rơgoh ‘lơ̆ng pran kơtang; tơgoăt pôm ƀơ̆r đon, pơm jŭk yuk trong hơlou lơ̆m khoa hŏk kmăi kmŏk, tơplih ‘nao tơchăr, tơplih kơsô̆; yak kơtang tŏk pran, atŏk tơ iung teh đak tĕnh koăng păng kơjăp ‘lơ̆ng lơ̆m chăl atŏk tơ iung pơdrŏng pran kơtang, hơnŭk hơnoa, gơ̆h hơgei, oei sa ‘lơ̆ng". Akŏm chĕp pơgơ̆r, pơrô̆ jang kiơ̆ kơtang, hrơ̆p mĭnh ‘măng, jơnei rim trong tơlĕch ăn, tơdrong jang hlôi đei tơlĕch păng 4 tơdrong jang kăl găh tơ iung pơjing Đảng; 8 tơdrong jang găh atŏk tơ iung mŭk drăm, tơpôl; 2 tơdrong jang găh vei lăng sơđơ̆ng teh đak, sơđơ̆ng tơpôl, jang tơbôl; pơtrŭt kơtang tŏk GDP jô̆ hơtŏ iŏk đei 10% lơ̆m sơnăm năm tơ̆ lơ. Hơnơ̆ng pơm pơkeh tơdrong tơchơ̆t, khôi luơ̆t; atŏk tơ iung trong hnam ‘lơ̆ng liĕm păng khul bơ̆ jang gơh hơgei, tơnăp ‘lơ̆ng. Pơtrŭt kơtang jang kmăi kmŏk gơh hơgei, hơmet ming pơ ‘lơ̆ng tơdrong jang mŭk drăm, hơlen sơkơ̆t hhơdăh tơdrong tŏk ‘nao, atŏk tơ iung kơtang khoa hŏk kmăi kmŏk, tơplih ‘nao tơchăr păng tơplih kơsô̆. Lăng kơjăp găh tơdrong oei sa joh ayŏ, tơpôl, vei lăng cham char, pơm hơtŏk hơrih sa sơđơ̆ng ăn kon pơlei. Hơnơ̆ng hơmet pơ ‘lơ̆ng, atŏk kơtang vei lăng sơđơ̆ng teh đak, sơđơ̆ng tơring; sơđơ̆ng dơ̆ng kơjăp tơring, sơđơ̆ng dơ̆ng kơjăp tơpôl; vei kơjăp rơngei hiôk hian, sơđơ̆ng ăn atŏk tơ iung teh đak tĕnh koăng păng kơjăp ‘lơ̆ng.