Yă H’Ních Niê bơngai Rađe tơ̆ phường Tân An đơ̆ng rŏng đei khăm hơlen jơhngâm pran ưh đei huach jên đơt mă blŭng yoa Anih vei lăng kon pơlei dêh char Đắk Lắk pơgơ̆r tơroi: “’Măng mă blŭng inh đei khăm hơlen jơhngâm pran mă ưh đei huach jên thoi âu, khăm đang ba gơ̆h băt jơhngâm pran ba thoi yơ. Kơdih kâu inh păng mih ma duch nă lơ̆m pơlei tôch hơiă. Hơpơi ‘mĕh đơ̆ng âu năm tơ̆ hơnăp kơnh hơnơ̆ng đei Đảng, Teh đak tơrek truh dơ̆ng vă mih ma duch nă kon kông hơnơ̆ng đei khăm hơlen jơhngâm pran ưh kơ đei hiong jên.”

Kiơ̆ yă Châu Thị Kim Phụng, Kơdră vei lăng Hnam pơgang phường Tân An, lơ̆m 2 giĕng pơgơ̆r khăm hơlen jơhngâm pran ưh đei iŏk jên ăn kon pơlei, vang tơgŭm chih akŏm đei jơhngâm pran điên tư păng the ƀao hiêm pơgang lơ̆m VNeID, tơring hlôi jang đang rim tơdrong hơgăt đei tơlĕch păng vă hơnơ̆ng pơih xă tơdrong khăm hơlen jơhngâm pran ưh đei iŏk jên hăm đĭ đăng kon pơlei: “Hnam pơgang pơgơ̆r khăm nội, ngoại khoa, hơnĕnh - ƀŏ – muh măt, đon, muh, hơlŏng, hơlen năng mă tôm, chih hơdăh jơhngâm pran kơ đe mih ma duch nă. Atum hăm ‘noh tơlĕch 1,2 ki thuơ̆t nhen set hơlen pham, đak hơyô, kŭm nhen phĭn X-quang. Kŭm hăm khăm hơlen jơhngâm pran, hnam pơgang oei tơgŭm ăn kon pơlei chih hơdăh rim kơsô̆ chih răk, tơmât lơ̆m hla ar khăm jĭ hăm điên tư.”

Ƀak si CKII Phạm Minh Hữu, Phŏ Kơdră Anih vei lăng jang pơgang dêh char Đắk Lắk ăn tơbăt, bơ̆ jang kiơ̆ nơ̆r pơtho đơ̆ng Anih vei lăng kon pơlei dêh char păng Tơdrong tơchơ̆t kơsô̆ 72 đơ̆ng Anih tơm Chinh trĭ găh khăm hơlen jơhngâm pran kiơ̆ khei, khăm đĕch ăn kon pơlei, Anih vei lăng tơlĕch trong jang truh tơ̆ đĭ đăng hnam pơgang, anih jang pơgang găh 102 xăh, phường lơ̆m dêh char; jang hơdoi hăm dôm hnam pơgang, anih jang pơgang kơdih hơmet kơmăy kơmŏk, tơmam drăm păng khul bơngai jang vă pơvih ăn kon pơlei. Lơ̆m noh jang pơlong năng tơ̆ 4 xăh, phường đei Tân An, Tuy Hòa, dôm xăh Đồng Xuân păng Krông Bông; 98 xăh, phường oei đei dơ̆ng gô tơlĕch jang hrơ̆ch đơ̆ng ‘năr 1/7 truh âu kơnh. Truh dang ei, vă jê̆ 500 ‘nu kon pơlei hlôi đei khăm hơlen tôm kiơ̆ nơ̆r pơtho đơ̆ng Anih tơm vei lăng jang pơgang, păng tơdrong khăm hơlen oei pơgơ̆r hơnơ̆ng hăm rơbâu ‘nu bơngai nai.

Ƀak si Phạm Minh Hữu pơma hơdăh, tơdrong gĭt kăl đơ̆ng kơchăng pơgơ̆r khăm hơlen jơhngâm pran ăn đĭ đăng kon pơlei: “Khăm hơlen jơhngâm pran ăn đĭ đăng kon pơlei đei klăih song pơm 3 grŭp tơm ‘nŏh Grŭp đơ̆ng ‘nao rơneh truh 6 sơnăm, grŭp đơ̆ng 6 – 18 sơnăm, oei đei dơ̆ng ‘nŏh grŭp đơ̆ng 18 sơnăm tŏk tơ̆ kơpal. Tơdrong kơchăng khăm hơlen jơhngâm pran gơ̆h tơgŭm băt hơdăh jơhngâm pran đĭ đăng kon pơlei thoi yơ, kiơ̆ tơdrong hơgăt jơhngâm pran tôch ‘lơ̆ng, ‘lơ̆ng, lăp ai dăh mă ưh ‘lơ̆ng, vă gơ̆h chih răk tôm tơdrong, păng mưh ƀôh đei jĭ jăn ‘nŏh tơtă ăn kon pơlei jăh năm hơmet tơ̆ hnam pơgang mă tơtom hloi.”

Dêh char Đắk Lắk đơ̆ng rŏng kơ tơmât hơdai đei 3,34 triu ‘nu kon pơlei. Bơ̆ jang kiơ̆ tơdrong Tơchơ̆t kơsô̆ 72 đơ̆ng Anih tơm Chinh trĭ, đơ̆ng 2026–2030, Đắk Lắk vă tơlĕch 1.000 ti hlak jên 1 sơnăm vă khăm hơlen jơhngâm pran ưh đei iŏk jên ăn kon pơlei. Hơdrô̆ sơnăm 2026, dêh char tơlĕch 400 ti ăn 102 hnam pơgang xăh, phường, hăm jên tơgŭm khăm dang 350 rơbâu hlak 1 ‘nu 1 vât khăm. Ƀok Lương Nguyễn Minh Triết, Bí thư Đảng dêh char Đắk Lắk pơma hơdăh, hăm tơring xă, kon pơlei oei xa răh rai, ưh đei akŏm mĭnh ƀôt, kơsô̆ unh hnam tơnuh păng kon pơlei kon kông lơ, tơdrong vei lăng jơhngâm pran đĭ đăng kon pơlei ‘nŏh jĭ tơdrong jang gĭt kăl, tôch ‘lơ̆ng, vă huei hŭt hơchăng bu tơ̆ rŏng.

Bí thư Đảng dêh char Đắk Lắk athei dôm anih jang kơpal, tơring tơrang bơ̆ jang hăm đon jang tơnăp hlŏh: “Dôm anih jang, khul grŭp păng anih jang pơgang athei năm tơ̆ rim pơlei, truh tơ̆ rim hnam vă pơm ‘lơ̆ng ăn rim bơngai gơ̆h đei khăm hơlen jơhngâm pran ưh đei hiong jên kiơ̆ khei, mă loi jĭ hăm bơngai đei kŏng, bơngai kră, bơngai jo jăn, unh hnam tơnuh păng kon pơlei kon kông. Anih jang pơgang lơ̆m dêh char athei akŏm tôch ai khul jang, tơmam drăm, kơmăy kơmŏk pơgơ̆r khăm hơlen mă ‘lơ̆ng, vă pơm ăn tơdrong khăm hơlen jơhngâm pran gơ̆h đei yoa ‘lơ̆ng hlŏh.”

Tơdrong khăm hơlen jơhngâm pran ưh đei iŏk jên ăn đĭ đăng kon pơlei ưh lăp tơgŭm băt hrôih tơdrong jĭ, tơtom hơmet pơ ‘lơ̆ng jĭ jăn đĕch, mă tơdrong jang ‘nâu oei tơgop pơjing tơdrong juăt kơchăng vei lăng jơhngâm pran lơ̆m tơpôl. Hăm tơdrong vang bơ̆ jang đơ̆ng rim anih jang chinh trĭ, đon pơhnŏng rim răih kon pơlei đei vei lăng jơhngâm pran, đei khăm hơlen tơdrong jĭ hăm kơmăy kơmŏk ‘nao tŏk bŏk vă jing đei tơpă, hơnhăk Tơdrong tơchơ̆t kơsô̆ 72 đơ̆ng Anih tơm Chinh trĭ jăh mât lơ̆m tơdrong arih xa kơ kon pơlei tơ̆ tơring bri kông./.