Thôn 17 dang ei hlôi đei tơroh hăm anih tơm xăh Ea Ning, năm tơ̆ apŭng Cư Kuin hăm trong ƀê tŏng xă, đei chô̆ unh tơ̆k hơdăh ăh kơmăng. Kiơ̆ kơ ƀok Nguyễn Văn Bá, erih jang xa tơ̆ thôn 17, jăl trong âu đei man đơ̆ng tơdrong atŭm tơgop đơ̆ng rim bơngai găh jên hu, plang teh păng lơ ‘năr jang. Tơdrong drơ̆ng lăp, tơguăt đơ̆ng kon pơlei thôn 17 duh tơgŭm vei xơđơ̆ng tơpôl, đon bơnôh pơlei pơla kueng ƀôt roi kơhret kơjăp, tơdrong tơtông tơmam choh pơtăm, phă pơrăm ‘long pơtăm pă đei oei. Ƀok Nguyễn Văn Bá ăn tơbăt, kon pơlei lơ̆m thôn dang ei xơđơ̆ng jơhngơ̆m erih jang xa: Adrol ki, âu jing tơring tơnap tap, lơ tơdrong pơm yoch glăi truh chă tơtông gre, xike ma twĭ, brơ̆t tơmam đe đei. Mă lei đơ̆ng ‘năr tơlĕch tôm kon pơlei vei xơđơ̆ng tơpôl păng vei lăng thôn, pơlei, vei xơđơ̆ng Tơpôl teh đak noh đei tôm kon pơlei vang jang, noh nhôn kĕ tang găn, tơdrong pơm glăi lơ̆m tơring âu roi năr roi tơjur. Hơdăh noh kơdră thôn Mao, xư noh đei xơnong tơnăp hloh, hlôh vao dơ̆ng, pơm jang găh vei hơlen, pơjing tơdrong jang vei xơđơ̆ng ăn pơlei pơla, rim tơring.

Ƀok Mao mă ƀok Nguyễn Văn Bá tơroi noh hơnăn Lê Xuân Mao, jang kơdră thôn 17 đơ̆ng xơnăm 2014, ăh mă Kŏng ang dêh char Đăk Lăk rơih tơring âu vă jang hơdrol “Tơring kon pơlei xơđơ̆ng, ưh đei tơdrong pơm glăi lơ̆m tơpôl”. Vă tơdrong tơlĕch jang hrôih đei jơnei kăp gĭt, ƀok Lê Xuân Mao hlôi tơgŭm ăn dôm jăl pơgơ̆r tơring chă tơroi tơbăt, pơma dơnuh hăm kon pơlei, pơ ‘lơ̆ng tơdrong tơhĭl, pơ ‘lơ̆ng đon bơnôh hăm dôm bơngai hlôi yak glăi. Ƀok Lê Xuân Mao hơdơ̆r dơ̆ng: Nhôn tơlĕch tơdrong jang Tơring oei xa xơđơ̆ng, ưh đei tơdrong pơm glăi lơ̆m tơpôl, truh dang ei đei 8 xơnăm bơih. Nhôn hơnơ̆ng pơgơ̆r hŏk hôp kon pơlei, tơroi ăn kon pơlei băt găh vei xơđơ̆ng tơpôl Teh đak, dang rim ‘nu kon pơlei noh minh ‘nu kŏng ang. Mă 2 noh đei 5 Khul unh hnam lơ̆m thôn noh rim khul unh hnam akŏm jing minh khul tang găn păng tơjră pơm glăi. Nhôn tơroi tơbăt, pơma đam găh tơdrong vei xơđơ̆ng tơpôl, đang kơ noh hơtŏk pơhlôh ăn kon pơlei vă erih hăm dih băl rơhŏ rơhŏm hloh păng jang tơnăp tơdrong vei xơđơ̆ng pơlei pơla kueng ƀôt.

Kiơ̆ tơlĕch tơroi tơbăt truh dang ei, kon pơlei thôn 17 hlôi pơjao ăn 5 tong phao bơ̆ kơdih, pơ ‘lơ̆ng đon bơnôh 12 ‘nu tơdăm hơnơ̆ng pơm glăi luơ̆t pơkăp păng xơkơ̆t ưh đei bơh ƀơm hơlơ̆k dơ̆ng. Jơnŭm vei hơlen thôn hơnơ̆ng chă dăr juang păng tang găn đei 34 ‘măng đe tơdăm rơchong teh tôn băl, tơklăh 23 khul tơdăm akŏm hloh jơ pơkă pơm tơxŭl tơxăl tơpôl, kiơ̆ đơ̆ng unh hnam vă hơvơn đe xư tơbăt păng vei lăng ưh đei lê̆ đe tơdăm pơm glăi luơ̆t pơkăp.

Kơdih po ƀok Mao duh jang hadoi hăm khul Kŏng ang xăh xek tơlang  14 ‘măng teh tôn pơm rơka hơbur, pơ ‘lơ̆ng 20 ‘măng tơhĭl teh tôn băl lơ̆m tơpôl kon pơlei, vang chă hơlen ƀôh băt, tơkêng 5 ‘măng ngôi ƀĕng ƀŏng, tơroi ăn Kŏng ang xăh băt 12 kơtơ̆ng ang kăp gĭt vă ‘măn ăn tơdrong chă hơlen.

Gơnơm thoi noh, đơ̆ng tơring tơpôl ưh đei xơđơ̆ng, truh dang ei, thôn 17 jing hê̆ tơring xơđơ̆ng xơnêp xơnua, ưh đei tơdrong glăi Đăi wĭ Bùi Văn Trọng, Kơdră kŏng ang xăh Ea Ning, apŭng Cư Kuin xơkơ̆t, tơdrong pơkăp jang Tơring oei xa xơđơ̆ng, ưh đei tơdrong pơm glăi lơ̆m tơpôl tơ̆ thôn 17 hlôi pơm jang đei jơnei lơ̆m tơdrong vei xơđơ̆ng tơpôl, xơđơ̆ng tơdrong erih kon pơlei lơ̆m tơring: Hăm tơdrong đei jơnei kiơ̆ pơkăp jang noh duh hmach bơnê kơ xơnong jang hăm ƀok Lê Xuân Mao, Kơdră Jơnŭm pơkăp jang, noh tơnăp hăm xơnong đei pơjao vei xơđơ̆ng tơpôl tơ̆  thôn 17 duh nhen tơ̆ tơring. Ƀok âu pơ ‘nam hăt hot lơ̆m tơdrong jang, đei lơ tơgop tih tên ăn kŏng ang xăh duh nhen jơnŭm pơgơ̆r tơring lơ̆m tơdrong vei xơđơ̆ng tơpôl. Đơ̆ng đei jơnei kiơ̆ pơkăp pơm jang tơ̆  thôn 17 noh Kŏng ang xăh hlôi pơih xă đei 2 tơdrong pơkăp jang tơ̆ thôn 24 păng thôn 22 xăh Ea Ning.

Đơ̆ng jê̆ đĭ xơnăm 2021, ƀok Mao pă đei jang kơdră thôn 17, tơplih jang Kơdră Jơnŭm bơngai ‘lŏ xơnăm păng Jơnŭm bơngai ƀơm pơgang pơnhŭl da cam/dioxin xăh Ea Ning. Ƀok duh oei jang tang măt lơ̆m hô̆i đŏng kon pơlei tơ̆ apŭng păng jang lơ̆m Anih jang Măt trâ̆n tôh kuôk Việt Nam apŭng Cư Kuin. Tŏk 65 xơnăm, ƀok duh oei hơnơ̆ng tơguăt hăm kon pơlei lơ̆m thôn, ‘măn lơ jơ chă năm apong jet gia pơma dơnuh, hơlêm hăm dôm bơngai ‘nao lĕch đơ̆ng hnam phak păng chôt vih erih atŭm hăm tơpôl pơlei pơla, pơtho akhan đe xư akŏm pơm jang, ưh đei huăng lơ̆m tơdrong glăi xar bar âu to.

Hăm dôm tơdrong tơgop noh, ƀok Lê Xuân Mao đei kon pơlei lui ngeh, băt ‘mêm, pơtoi đei iŏk Hla bar pôk bơnê, Ƀăng pôk bơnê đơ̆ng Anih vei lăng kon pơlei dêh char păng Kơdră Kŏng ang dêh char Đăk Lăk. ‘Nao âu, ƀok Mao chơt hơ iă jing minh lơ̆m 15 bơngai jang rơgei kơ jâ̆p teh đak đei Ƀô̆ trương Anih tơm Kŏng ang pôk Ƀăng hmach bơnê kơyươ hlôi tơgop tih tên ăn tơdrong jang tang găn păng tơjră pơm glăi lơ̆m tơpôl păng tơdrong jang Tôm kon pơlei vei xơđơ̆ng tơpôl Teh đak xơnăm 2022.