Xah Lạc Dương, dêh char Lâm Đồng đei pơjing kiơ̆ pơkăp tơmơ̆t hơdai 3 xah: Đạ Sar, Đạ Nhim păng Đạ Chais kơ apŭng Lạc Dương so. ‘Nou jĭ xah đei teh să hloh dêh char, jê̆ 830km2, kơsô̆ măt bơngai đei jê̆ 15.000 ‘nu, mă lơ noh kon pơlei Cơ Ho. Xah đei 30 Chi ƀô̆ hăm hloh 500 đảng viên. Ƀok Ya Tiong, Ƀĭ thư xah Lạc Dương ăn tơbăt, lơ̆m tơdrong hơmet păng jang kiơ̆ jơnŭm pơgơ̆r tơring pơm jang đơ̆ng năr 1/7, xah tơrĕk tơnăp truh tơdrong iŏk yua tơdrong tơguăl tơguăl lơ̆m kang ƀô̆ păng kon pơlei: “Hơdrol hloh noh lơ̆m anih jang athei drơ̆ng minh, tơguăt tơguăl noh mă kăp gĭt vă đe kơdră pơgơ̆r pơm jang. Ah năr 2/7 noh pơjing dôm anih jang đei tơrĕk truh tơdrong pơgơ̆r jang tơ̆ xah. Kon pơlei kon kông tơ̆ ou đei truh 86%, teh noh să, kon pơlei oei rah rai, nhôn kơchăng đơ̆ng blŭng vă kon pơlei tơ̆ ou tơguăt tơguăl, drơ̆ng minh đon”.

Đơ̆ng rŏng tơmơ̆t hơdai 3 dêh char Lâm Đồng, Đăk Nông păng Bình Thuận, dêh char Lâm Đồng ‘nao akŏm đei tôm tơdrong kăl vă hơtŏk tơ-iung kơtang, chĕp kơ̆l, nhen tơmang pơhiơ̆ bri – đak dơsĭ Đà Lạt-Phan Thiết; đei lơ bauxite hloh kơ jơ̆p teh đak hăm pơhlom 5,4 tih tơ̆n đei sir akŏm; dôm hơlŭng đak dou lơ tih să; cham đak dơsĭ hơtaih 192 km…

Vă tenh kuăng vei lăng, pơgơ̆r jang, iŏk tơdrong hiôk, mŭk drăm lơ̆m minh tơring teh tih să đơ̆ng bri jur truh đak dơsĭ, dêh char Lâm Đồng sơkơ̆t hơdah jơnŭm pơgơ̆r tơring 2 tăl kăl pơm jang tơnăp tơpă đei jơnei. Ƀok Nguyễn Hồng Hải, Phŏ Kơdră Anih jang vei lăng kon pơlei dêh char Lâm Đồng ăn tơbăt, tơdrong ou hơdrô̆ gơh pơm jang đei jơnei mưh đei tơdrong tơguăt tơguăl kơjăp: “Bơ̆n tŏk bŏk oei tơplih tơdrong pơm jang noh tam mă băt tôm tong ôh. Tơdrong mă blŭng noh athei tơguăt tơguăl vă bơ̆n atŭm keh đang sơnong jang kơ dêh char ‘nao. Mưh bơ̆n ưh đei tơguăt tơguăl noh ưh kĕ pơm jang ôh. Bơ̆n athei atŭm jơhngơ̆m jang hloi dôm tơdrong jang đei tơlĕch kăl kơ akŏm pơm jang”.

Lơ̆m tơdrong jang lang lap kơ minh dêh char ‘nao đei tơ-iung pơjing đơ̆ng tơdrong tơmơ̆t hơdai 3 dêh char, sơnăm ou dêh char Lâm Đồng ‘nao pơkăp khŏm mă jang đei jơnei tơchơ̆t hơtŏk mŭk drăm hloh 8% păng hơtŏk  2 kơsô̆ tŏk tơ̆ kơpal lơ̆m khei năr đơ̆ng rŏng. Vă đei jơnei tơdrong ou, kang ƀô̆ păng kon pơlei dêh char Lâm Đồng tŏk bŏk yơ̆l kơjunghla kơ Tơguăt tơguăl nhen nơ̆r Ƀok Hô pơtho vă pơjing jơhngơ̆m pran atŭm, pơjing dêh char Lâm Đồng hơtŏk tơ-iung tenh păng kơjăp sơđơ̆ng.