Pơtoi kơ tơdrong tơjrâ̆m tơbôl jang hadoi kon pơlei Việt Nam – Campuchia 'măng mă 5, kơsơ̆ năr 7/11, tơ̆ dêh char Đăk Nông hlôi pơgơ̆r tơjrâ̆m, pơma dơnuh đơ̆ng Khul Kơpal kơ 2 teh đak Việt Nam – Campuchia hăm bơngai juăt jang xo xơ̆, khul linh vei xơlam teh păng đe hơdruh tơdăm dêh char Đăk Nông.

Vang năm akŏm, găh Campuchia đei ƀok Vann Phal, tơgŭm jang ăn Thủ tươ̆ng Hun Sen, Phŏ Kơdră Jơnŭm jang tơbôl Campuchia-Việt Nam chĕp kơ̆l khul atŭm hăm tang măt ăn dôm anih jang, tơring kơ teh đak Campuchia. Tơ̆ jơ tơjrâ̆m, tang măt ăn khul mơlôh vang năm akŏm tơjrâ̆m, pơmai H’Hồng, Phŏ Ƀĭ thư Anih jang đoan dêh char Đăk Nông hmach bơnê hăm dôm tơdrong plang đơ̆ng chăl mih ma kơyuơ tơdrong rơngei hiôk hian, păng hơtŏk tơdrong tơbôl tơguăt đơ̆ng 2 teh đak Việt Nam - Campuchia. Xơnăm mơlôh Đăk Nông pơma adrô̆ păng xơnăm mơlôh kơ 2 teh đak pơma atŭm gô pơtoi hơtŏk pơ 'lơ̆ng tơbôl kăp gĭt âu.