VOV4.Bahnar - ‘Nao âu, bơ̆ jang hăm kơ dră chĕp kơ̆l dêh char Khánh Hòa, Thủ tướng Phạm Minh Chính pơ ma hơ dăh: Pơ jing apŭng achon kông tơ̆ đak dơ sĭ Trường Sa jing anih tơm jang mŭk drăm, jŏh ayŏ kơ dŏ xoang, tơ pôl tơ̆ đak dơ sĭ kơ tĕh đak, jĭ tơ ring tang găn pran kơ jăp, vang vei lăng tơ drong pơm tơm tơ̆ đak dơ sĭ, achon kông tơ̆ đak dơ sĭ gĭt kăl kơ tĕh đak. Dôm sơ năm âu ki, đei tơ dỏng tơ rĕk đơ̆ng Đảng, tĕh đak păng khul linh, lơ anih gĭt kăl pơ yoa ăn tơ drong arih xa păng bơ̆ jang tơ̆ achon kông Trường Sa đei man, lơ̆m nŏh đei anih pơm tơ lĕch unh điên măt ‘năr păng anih pơm tơ lĕch unh điên đơ̆ng kial.

Thiếu tá Nguyễn Văn Chiến, vei lăng unh điên tơ̆ achon kông Trường Sa Đông ăn tơ băt, đei tơ drong tơ rĕk, tơ gŭm đơ̆ng Đảng păng tĕh đak, tơ drong arih xa kơ kăn ƀô̆, linh păng kon pơ lei tơ̆ apŭng achon kông Trường Sa, dêh char Khánh Hòa roi đunh roi tŏk ‘lơ̆ng. Gơ̆h pơ ma, Trường Sa jĭ apŭng mă blŭng lơ̆m tĕh đak đei tơ̆k hơ dăh hăm unh điên rơ gŏh. Gơ nơm đei unh điên sơ đơ̆ng ‘lơ̆ng, dôm tơ drong arih xa, bơ̆ jang tơ̆ achon kông hiôk ƀiơ̆ kơ adrol ki. Thiếu tá Nguyễn Văn Chiến pơ ma: "Inh đei 8 ‘măng xa têt tơ̆ achon kông âu, unh điên adrol ki gơ nơm đơ̆ng kơ măy đôh ngăl, tam đei unh điên rơ gŏh, kơ na tơ drong ngôi pơ chơt, hơ ri hơ xoang ưh gan chơt, yoa gơ nơm đơ̆ng unh điên. Đơ̆ng rŏng âu, đei tơ gŭm man anih pơm tơ lĕch unh điên rơ gŏh, đei măh mai unh điên kơ na tơ drong arih xa kơ đe kăn ƀô̆, linh tơ̆ achon kông roi đunh roi tŏk ‘lơ̆ng ƀiơ̆".

Anih pơ lăp Pil măt ‘năr tơ̆ apŭng achon kông tơ̆ đak dơ sĭ Trường Sa

 Adrol ki, yoa oei hơ tăih kơ groi tĕh tơ̆ kông, dôm achon tơ̆ Trường Sa tơ tă iŏk yoa kơ măy đôh vă pơm tơ lĕch unh điên pơ yoa ăn tơ drong arih xa, tơ̆k hơ dăh păng bơ̆ jang đơ̆ng ƀô đô̆i păng kon pơ lei tơ̆ achon kông lơ̆m đak dơ sĭ. Unh hơ yuh âu tôch kơ huach jên mă lei ưh sơ đơ̆ng, kơ măy đôh kơ dâu tôch hrơ̆ng păng pơm ‘mê̆ ‘mach cham char, kơ na lăp yoa 2,3 jơ tơ̆ kơ măng đĕch păng yoa lơ̆m tơ drong kăl đĕch. Mă lei 10 sơ năm vih tơ̆ âu, dôm achon kông tơ̆ Trường Sa đei pơ lăp ăn unh điên rơ gŏh, tơ gĕch iŏk ‘năr tŏ, kial tơ̆ Trường Sa vă pơm tơ lĕch unh điên pơ yoa ăn tơ drong arih xa păng pơ tâp pơ hrăm kŭm nhen kơ chăng tơ blăh.

Ưh lăp thoi nŏh đĕch, kơ măy pơm tơ lĕch unh điên rơ gŏh tơ̆ Trường Sa hơ nơ̆ng đei tơ chĕng hơ len, kơ dâu pơ long năng păng hơ met pơ ‘lơ̆ng, vă unh điên tơ̆ Trường Sa roi đunh roi hơ dăh ang. Thượng úy Dương Tuấn Hải, vei lăng anih pơm tơ lĕch unh điên tơ̆ achon kông Đá Đông A ăn tơ băt, achon kông ‘nao đei pơ lăp păng tơ mât yoa unh điên rơ gŏh 3 pha đơ̆ng jăl khei mă 4 sơ năm sơ̆: "Unh điên âu tôch jăng, unh 3 pha kơ na sơ đơ̆ng, tơ mât yoa pơ long năng vă gơ̆h pơih xă hlŏh dơ̆ng, jăng hlŏh unh điên 1 pha. Kiơ̆ nơ̆r chih 1 jơ pơm tơ lĕch đơ̆ng kơ kuat kial păng pil tơ̆ achon ‘nŏh đei dang 25kw. Mưh năr ‘mi, ưh đei tŏ, gơ̆h ‘măn răk truh 3 năr ưh kăl pơih kơ dâu kơ măy dơ̆ng, dang ei yoa 1 năr lăp dang 5 kw".

Unh hơ yuh rơ gŏh tơ̆ Trường Sa.

Unh hơ yuh rơ gŏh hăm kơ măy kơ mŏk ‘nao, vei lăng hăm kơ măy tĭnh, kŭm athei đe linh bơ̆ jang chă set hơ len, hŏk pơ hrăm dơ̆ng lơ tơ drong vă gơ̆h ăn kơ măy kơ dâu sơ đơ̆ng 'lơ̆ng, đei yoa. 'Nhŏng Trần Văn Đức, bơ ngai jang tơ̆ Hnam kơ măy achon kông Đá Tây A tơ roi: "Kơ dih kâu năm jang đunh bơih, adrol ki oei tơ̆ tơ ring hơ tăih yăih, dang ei bơ̆ jang hăm kơ măy kơ mŏk chih hăm nơ̆r Anh, nơ̆r tĕh đak đe ngăl, lơ tơ drong tôch mơ mat tat. Mă lei (khul vei lăng tơ̆ groi kông) ưh đei bu năm tơ plih bơ̆n (kơ măy) tơ tom ôh, kơ na ba athei hŏk pơ hrăm, vă gơ̆h hlôh vao, bơ̆ jang ‘lơ̆ng ƀiơ̆. Blŭng a kŭm tôch mơ mat, mă lei dang ei tơ mât lơ̆m Inveter kơ dâu kơ dih ngăl bơih, ba hơ nơ̆ng vei lăng, hơ met ming kiơ̆ khei…"

‘Nao âu, pơ ma lơ̆m jơ bơ̆ jang hăm kơ dră chĕp kơ̆l dêh char Khánh Hòa, Thủ tướng Phạm Minh Chính akhan, athei tơ lĕch jang hrơ̆ch ‘lơ̆ng dôm trong jang atŏk tơ iung mŭk drăm tơ̆ đak dơ sĭ păng vei lăng tơ drong pơm tơm tơ̆ đak dơ sĭ, achon kông đak dơ sĭ, tơ mât hơ dai tơ drong jang khul linh vei sơ đơ̆ng tĕh đak, vei kơ jăp chinh trĭ păng vei sơ đơ̆ng tơ pôl kiơ̆ rim trong jang, tơ drong tơ proh hơ drol, tơ drong vă jang atŏk tơ iung mŭk drăm tơ pôl; pơ jing apŭng achon kông Trường Sa jing anih tơm jang mŭk drăm, jŏh ayŏ kơ dŏ xoang, tơ pôl tơ̆ đak dơ sĭ kơ tĕh đak, jing tơ ring tang găn pran kơ jăp, vang vei ‘lơ̆ng tơ drong pơm tơm đak dơ sĭ, achon kông tơ̆ đak dơ sĭ gĭt kăl kơ tĕh đak.

“Atŏk tơ iung Trường Sa jing anih jang mŭk drăm – jŏh ayŏ kơ dŏ xoang – tơ pôl tơ̆ đak dơ sĭ kơ tĕh đak, jĭ anih jang pran kơ jăp, vei lăng tơ drong pơm tơm đak dơ sĭ, achon kông đak dơ sĭ kơ Tĕh đak ‘moi kiơ̆ khôi luơ̆t bơ̆n păng luơ̆t apŭng plenh tĕh, kăl loi jĭ UNCLOS 1982, păng đơ̆ng rŏng kơ chĕng hơ met, tơ proh trong jang đang athei pơ 'nhŏ jơ hngâm bơ̆ jang hloi, blŭng a 'nŏh akŏm jên tơ gŭm ăn tơ drong jang rôp yâu ka, đang kơ 'nŏh tơ gŭm ăn kon pơ lei hơ nơ̆ng lĕch tơ̆ noh vang jang atŏk tơ iung mŭk drăm, tơ pôl, vei sơ đơ̆ng tơ drong arih xa đunh đai, mă loi hơ met kơ jăp khul linh vei sơ đơ̆ng tĕh đak tơ̆ apŭng achon kông Trường Sa âu.”

Dơ̆ng: Tơ blơ̆