VOV4.Bahnar - Mĭnh lơ̆m dôm trong jang gĭt kăl vă jang tơ iung ming dơ̆ng mŭk drăm ‘nŏh jĭ hơ tŏk tơ drong asong tŏk iŏk jên, hơ nhăk jên tơ mât ăn dôm tơ drong jang kăl. Tơ chĕng ‘lơ̆ng hăm tơ drong jang tŏk dơ̆ng mŭk drăm, lơ anih mong jên oei pơ hnŏng jang tŏk tŏ sĕt hlŏh ‘nŏh đơ̆ng 20%-30% lơ̆m sơ năm ‘nâu, mă lơ ‘nŏh pơ yoa ăn tơ drong tĕch le, asong ăn đe tŏk iŏk, tŏk iŏk pơ dơ̆ng hăm tĕh, hnam.

Kiơ̆ kơ sô̆ chih jô̆ đơ̆ng Anih mong jên tĕh đak, jên asong tŏk iŏk jô̆ truh đĭ khei 2 tŏk 1,82% pơ têng hăm hơ tuch sơ năm 2021. Kŭm kiơ̆ kơ sô̆ chih jô̆ đơ̆ng Anih mong jên tĕh đak, hơ tuch sơ năm 2021, akŏm đĭ đăng jên asong tŏk iŏk đei 10,44 triu ti hlak jên. Thoi nŏh, lơ̆m 2 khei blŭng sơ năm, rim anih mong jên hlôi tơ lĕch jên ăn tơ drong jang mŭk drăm hlŏh 190.000 ti hlak jên đơ̆ng tŏk iŏk. Adrol kơ ‘nŏh, Anih mong jên tĕh đak ăn tơ băt, jên asong tŏk iŏk đĭ tŏk dang 2,74% lơ̆m khei 1/2022, hơ tŏ hăm vă jê̆ 286.000 ti hlak jên. ‘Nâu jĭ kơ sô̆ lơ hlŏh lơ̆m dang 10 sơ năm âu ki, tơ ƀôh hơ dăh tơ drong ‘mĕh tŏk iŏk jên vă jang xa tŏk lơ lơ̆m dôm khei blŭng sơ năm. Dôm bơ ngai juăt jang oei tơ dra ‘lơ̆ng găh tơ drong asong tŏk iŏk jên lơ̆m sơ năm ‘nâu. Kiơ̆ hla ar chih tơ blang đơ̆ng Công ty chứng khoán BSC, tơ drong ‘mĕh vă tŏk iŏk jên sơ năm 2022 gô tŏk lơ, rŏ năng tŏk truh 14%, đei tơ gŭm yoa tơ drong jang tŏk mŭk drăm đơ̆ng rŏng kơ jĭ roi ‘lơ̆ng. ‘Ngoăih kơ ‘nŏh, jên tơ gŭm pơ hlom 350.000 ti lơ̆m 2-3 sơ năm truh vang tơ gop pơm hơ tŏk jên asong tŏk iŏk ‘năi.

Phŏ Kơ dră chĕp kơ̆l Anih mong jên tĕh đak Đào Minh Tú ăn tơ băt: “Sơ năm 2022 nhôn hơ nơ̆ng hơ met ming trong jang jên hu kiơ̆ trong rơ gei ‘lơ̆ng, pơ jing tơ drong ‘lơ̆ng hlŏh ăn anih tĕch mơ dro, tơ gŭm tơ lĕch jên ăn tơ drong jang mŭk drăm. Lơ̆m trong vei lăng jên hu nhôn ‘moi kiơ̆ tơ drong jang tŏk ming dơ̆ng mŭk drăm đơ̆ng Khul kơ dră tĕh đak, pơm ‘lơ̆ng ăn tơ drong tang găn kơ jă tơ mam tŏk, vei sơ đơ̆ng lơ̆m tĕh đak, vei kơ jăp kơ jă jên, pơm ‘lơ̆ng ăn kơ jă jên mưh tơ plih băl kŭm nhen vei lăng ‘lơ̆ng anih mong kla jên hăm jên tĕh đak, anih tĕch mơ dro măih.” 

Găh tơ drong pơ truh jên ăn tơ drong jang mŭk drăm, Anih mong jên tĕh đak hơ nơ̆ng jang kiơ̆ dôm trong jang vă vei lăng tơ drong asong tŏk iŏk jên, hơ dai hăm pơm hơ tŏk tơ drong ‘lơ̆ng đơ̆ng tŏk iŏk jên. Atŭm hăm ‘nŏh, anih mong jên pơ tho ăn dôm anih asong tŏk iŏk jên hơ tŏk tơ drong vei sơ đơ̆ng đei yoa, akŏm jên asong tŏk iŏk găh tơ drong jang xa, pơ ‘nhŏ ăn dôm trong jang đơ̆ng Khul kơ dră tĕh đak, vei kơ jăp tơ drong asong tŏk iŏk jên hăm dôm tơ drong jang krê nhen tĕch mơ dro tĕh, hnam, chứng khoán, dôm tơ drong jang BOT, BT pơm trong, hơ tŏk tơ drong vei lăng hăm jên asong tŏk iŏk vă pơ yoa ăn tơ drong arih xa, răt tơ mam, pơ jing tơ drong ‘lơ̆ng ăn anih tĕch mơ dro păng kon pơ lei đei tŏk iŏk jên. 

Yă Hà Thu Giang, Phŏ kơ dră Anih vei lăng jên hu, Anih mong jên tĕh đak ăn tơ băt: “Jên asong tŏk iŏk hơ nơ̆ng ro mât lơ̆m 5 tơ drong đei pơ ‘nhŏ hơ drol, păng 5 tơ drong jang âu jang tŏk kŭm pran ƀiơ̆ kơ dôm tơ drong jang nai, 5 tơ drong đei pơ ‘nhŏ hơ drol ‘nŏh jĭ chŏh jang xa, tơ ring tơ rang, anih tĕch mơ dro iĕ păng păh lăp, tĕch mơ dro tơ̆ tĕh đak đe, jang kơ măy tơ gŭm păng kơ măy kơ mŏk ‘nao tơ tă dôm tơ drong jang gĭt kăl ngăl, yoa thoi nŏh trong jang truh sơ năm 2022 đơ̆ng Anih mong jên tĕh đak kŭm akŏm jên pơ ‘nhŏ ăn dôm tơ drong jang ‘nâu ‘năi.”

‘Nao âu, Grŭp jang găh Anih mong jên lơ̆m Hop akŏm Anih tĕch mơ dro Việt Nam (VBF) athei anih mong jên tĕh đak hơ len năng, pơih xă room tŏk iŏk jên vă dôm anih mong jên đei trong asong tŏk iŏk jên, tơ gŭm ăn dôm anih tĕch mơ dro, mă loi jĭ dôm anih tĕch mơ dro păh lăp păng iĕ mưh kăl. Tơ drong ƀơk room tŏk iŏk jên ưh lăp vă vei lăng đĕch mă oei vă jang kiơ̆ trong jang jên hu chăl ‘nao dơ̆ng. Tơ drong tơ mât yoa jên asong tŏk iŏk tôch ai rŏ năng gô hŭt lê̆ tơ̆ hơ năp kơnh mưh dôm trong asong tŏk iŏk kŭm nhen dôm anih mong jên tĕch mơ dro pơm lăp hăm tơ drong ‘mĕh vă tơ̆ 1 anih jang. Bơ ngai juăt jang Nguyễn Trí Hiếu akhan, lơ̆m dôm khei truh, tơ dra adrol tơ drong ‘mĕh vă tŏk iŏk jên đơ̆ng dôm anih tĕch mơ dro đơ̆ng rŏng kơ jĭ gô tŏk lơ, vă mŭk drăm tŏk ‘lơ̆ng ƀiơ̆ ‘nŏh tơ drong pơih jên asong tŏk iŏk đơ̆ng anih mong jên gô tôch đei yoa ăn rim bơ ngai păng anih tĕch mơ dro. Anih mong jên tĕh đak athei hŭt lê̆ room asong tŏk iŏk vă rim anih mong jên tơ lĕch trong jang xa kơ dih.

Ƀok Nguyễn Thanh Tùng, Phŏ Kơ dră chĕp kơ̆l Anih mong jên TMCP Ngoại thương Việt Nam Vietcombank pơ ma hơ dăh, kơ sô̆ jên đei tơ lĕch ‘nao gô ‘măn vă tơ gŭm ăn tơ drong jang xa, tĕch mơ dro, jang tŏk dơ̆ng mŭk drăm: “Đĭ đăng room asong tŏk iŏk jên đơ̆ng Anih mong jên tĕh đak gơ̆h asong hơ tŏk thim, Vietcombank vă ‘măn jên ăn dôm tơ drong jang kăl đơ̆ng anih jang mŭk drăm, pơ yoa ăn tơ drong jang xa, tĕch mơ dro kŭm nhen tơ drong arih xa kơ kon pơ lei.”

Nơ̆r tơ roi găh anih mong jên ‘nao âu đơ̆ng Công ty chứng khoán Rồng Việt (VDSC) kŭm tơ chĕng ‘lơ̆ng lơ̆m sơ năm ‘nâu, dôm tơ drong jang tơ iung ming dơ̆ng mŭk drăm gô ƀơm ‘lơ̆ng truh anih mong jên. Dôm kơ sô̆ jên tơ gŭm tơ gop gĭt kăl lơ̆m tơ drong vei kơ jăp đon lui ăn anih tĕch mơ dro, hơ met trong kla pơ dreu, pơ truh jên atŭm hăm 'nŏh tơ jur ƀiơ̆ hiong răm hăm jên tŏk iŏk lăng kiơ̆ tơ drong jang, pơm 'lơ̆ng ăn tơ drong đei yoa đơ̆ng dôm kơ sô̆ jên pơ trut jang xa păng bơ̆ jang tơ iung ming dơ̆ng. Mưh tơ drong tĕch mơ dro đei hơ met pơ 'lơ̆ng 'nŏh gô găn ƀiơ̆ tơ drong krê đơ̆ng asong tŏk iŏk jên vă jang mŭk drăm. Đơ̆ng nŏh tưk tơ iung tơ drong pơ truh jên asong tŏk iŏk. Mă đơ̆ng thoi nŏh ră, kơ dră chĕp kơ̆l 1,2 anih mong jên oei akhan, oei đei lơ tơ drong krê ưh gơ̆h băt hơ drol nhen kơ jă tơ mam tŏk hơ lơ̆k dơ̆ng, tơ drong jang tŏk dơ̆ng tơ̆ 1,2 anih jang oei hiơ̆… mă lei năng atŭm, đon hơ mĕng jang tŏk mŭk drăm sơ năm 'nâu 'lơ̆ng ƀiơ̆ kơ sơ năm adrol sơ̆. Anih mong jên jĭ 1 lơ̆m dôm anih jang đei hơ nơ̆ng tŏk 'lơ̆ng hlŏh lơ̆m sơ năm 'nâu.

Vũ Bảo Ngọc: Chih

Dơ̆ng: Tơ blơ̆