‘Nâu jĭ 1 tơdrong ‘lơ̆ng chĭnh trĭ, tơpôl păng ‘mêm mơnat gĭt kăl, tơƀôh jơhngơ̆m đon “Đĭ đăng lơ̆m teh đak lăng găh tơring sơlam, yua kơ khei ‘năr tơ̆ hơnăp kơnh kon oh kon pơlei dôm hơdrĕch kon kông”. Thủ tướng Phạm Minh Chính vang truh pơm lêh tơlĕch jang tơ̆ hơnih hnam trưng tơm: Hnam trưng hŏk teh đak rong ‘me jăl 1 păng jăl 2 xăh Yên Khương, Thanh Hóa. Pơma hơdăh Đảng, Teh đak bơ̆n ling lang lăng kăl pơtho pơhrăm ‘noh jĭ trong jang kăl hloh kơ teh đak, hăm hơnăp jang tôch kơ gĭt kăl, pơm tơdrong ‘lơ̆ng pơjing păng hơtŏk tơiung jơhngơ̆m đon ‘lơ̆ng, gơh hơgei đơ̆ng kon pơlei, jing tơdrong tơm tơchơ̆t vei sơđơ̆ng tơdrong jơnei, Thủ tướng roi tơbăt, Anih tơm Chĭnh trĭ hlôi drơ̆ng nơ̆r păng akŏm chĕp kơ̆l pơgơ̆r trong jang tơmơ̆t jên jang ming man dôm hnam trưng hŏk teh đak rong ‘me jăl 1 păng jăl 2 tơ̆ 248 xăh sơlam. Vă vei sơđơ̆ng hơnhăk dôm hnam trưng ‘nao tơmơ̆t bơ̆jang pơvih ăn sơnăm hŏk ‘nao 2026-2027, Thủ tướng athei Anih tơm vei lăng găh pơtho pơhrăm, kơdră chĕp kơ̆l tơring hơnơ̆ng jur tơ̆ hơnih ming man, tơtom hơmet pơ ‘lơ̆ng dôm tơdrong pơmat tat, tơhlăk tơhlĭn, tơgŭm dôm bơngai iŏk jang, anih bơ̆jang, pơtho tơƀôh dăr lăng đei tơdrong hiôk bơ̆jang ‘lơ̆ng, iŏk jang ming man hnam trưng hăm jơhngơ̆m đon hơdrin ‘lơ̆ng hloh - đĭ đăng yua kơ rim jơhnơr hŏk tro ‘mêm kơ eng, yua kơ tơdrong hơtŏk tơiung kơ kon pơlei rim hơdrĕch hơdrŭng tơring sơlam gĭt kăl kơ Teh đak.

Tơ̆ Đak Lak,  Phó Thủ tướng Mai Văn Chính truh pơm lêh tơlĕch jang man Hnam trưng teh đak rong jăl mônh păng jăl 2 tơ̆ xăh sơlam Ia Rvê, dêh char Đắk Lắk. Tơ̆ jơ pơm lêh, Phó Thủ tướng Mai Văn Chính hlôi tơlĕch nơ̆r athei man hnam trưng păng hơpăh tơmam ăn hŏk tro, thây kô, pơlung đe sư adrin yak hlŏh pơmat tat, adrin pơtho, hŏk mă ‘lơ̆ng. Kŭm hăm hnam trưng tơ̆ xăh Ia Rvê, lơ̆m ‘măng mă âu dêh char Đắk Lắk oei tơlĕch man 2 tŏ Hnam trưng teh đak rong nai hai ‘nŏh jĭ: Hnam trưng teh đak rong xăh Ia Lốp đei jên man truh 105 ti, Hnam trưng teh đak rong xăh Buôn Đôn đei jên man hlŏh 158 ti. Dôm hnam trưng âu đei đơ̆ng 900 truh hlŏh 1.100 ‘nu hŏk tro.

 Tơ̆ Lâm Đồng, Phŏ Thủ tướng Hồ Đức Phớc vang truh pơm lêh tơlĕch jang ming man Hnam trưng hŏk teh đak rong ‘me jăl 1, jăl 2 Thuận An. Hnam trưng ‘nao ‘lơ̆ng gô jing hơnih hŏk pơhrăm, rong ‘me hloh 1.000 ‘nu hơioh dôm hơdrĕch kon kông lơ̆m xăh sơlam Thuận An, dêh char Lâm Đồng đei ming man lơ̆m teh să 5hek tar, akŏm jên pơm hloh 225 ti hlak jên. Pơma tơ̆ lêh tơlĕch jang, Phŏ Thủ tướng Hồ Đức Phớc pơma hơdăh, Đảng, teh đak ling lang lăng kăl pơtho pơhrăm ‘noh jĭ trong jang kăl hloh kơ teh đak, sa roi tơ̆ dôm tơring pơmat tat hloh ‘noh sa roi athei bơngơ̆t truh.

Phŏ Thủ tướng athei Anih tơm vei lăng găh pơtho pơhrăm kŭm hăm dêh char Lâm Đồng păng dôm anih jang ƀơm truh athei bơngơ̆t truh chĕp kơ̆l, pơgơ̆r, hơlen lăng pơm liơ hnam trưng đei man vei sơđơ̆ng ‘lơ̆ng păng dôm tơdrong ƀơm truh, mă loi ‘noh jĭ bơngai jang, jên vă gơh iŏk yua ‘lơ̆ng, kơjăp truh kơ hrĕng sơnăm.