VOV4. Bahnar - Pơgê năr 3/6, tơ̆ pơlei tơm Đà Lạt, Dơnŏ anĭh tơm vei lăng Chŏh jang sa păng Atŏk tơ iung tơring tơrang hlôi tơlĕch jang Tơdrong vă jang vei lăng cham char kơ jăp ‘lơ̆ng ‘moi kiơ̆ trong iung jang atŏk tơ iung kơ jăp ‘lơ̆ng hoei pơm hiong răm bri ‘long tơ̆ Lâm Đồng păng Dak Nông.

Tơdrong vă jang kơ yuơ Jơnŭm atŭm châu Âu (EU) tơgŭm ăn ‘moi kiơ̆ Tơdrong jang Atŏk tơ iung Liên hợp quốc (UNDP), hăm kơ jă kơ jên 5 trĭu euro păng tơlĕch jang kiơ̆ đơ̆ng sơnăm 2022-2026. Tơdrong tơm ‘nŏh atŏk kơtang tơdrong kơ jăp ‘lơ̆ng găh cham char, tơdrong erĭh sa tơpôl, kĕ tang găn hơlau păng trŏ lăp hăm tơdrong chŏh jang sa păng trong jang pơm tơlĕch tĕch mơdro kơ tơring Tây nguyên. Adoi hơmet pơ ‘lơ̆ng tơdrong erĭh sa sơđơ̆ng ăn dôm bơngai ngăl đei ƀơm ư̆h kơ ‘lơ̆ng, dôm kon pơlei kon kông păng đe drŏ kăn lơ̆m rim tơdrong chŏh jang sa păng tơmang pơ hiơ̆ cham char. Puăn apŭng đei rơ̆ih jang pơlong năng tơdrong au ‘noh Dak Glong, Dak R’Lấp kơ dêh char Dak Nông păng apŭng Di Linh, Lạc Dương kơ dêh char Lâm Đồng.

Tơblơ̆ nơ̆r: Amazưt