Tơdrong thi chih hla ar tơroi âu gô tơgop pơm tơiung jơhngâm pran vă hơtŏk tơdrong ‘lơ̆ng, đei yoa đơ̆ng tơdrong roi tơbăt găh tơdrong jang đơ̆ng Kuôk hô̆i păng Jơnŭm pơgơ̆r kon pơlei, vang tơgop pơm hơtŏk tơdrong ‘lơ̆ng păng ƀai chih tơroi găh Kuôk hô̆i păng Jơnŭm pơgơ̆r kon pơlei.

Phŏ Kơdră chĕp kơ̆l Kuôk hô̆i Trần Thanh Mẫn hơpơi ‘mĕh, dôm bơngai chih hla ar tơroi, bơngai chih tơdrong kơtơ̆ng ang hơnơ̆ng tơiung jơhngâm đon tơnăp, pơtâp pơhrăm găh chinh trĭ, hơtŏk đon rơgei, đei đon bơ̆ jang ‘lơ̆ng, hơnơ̆ng ‘moi kiơ̆ rim trong jang đơ̆ng Đảng, khôi luơ̆t tĕh đak; chih tơroi tơtom, trŏ ƀlep păng đei nơ̆r tơblang mă rơđăh găh anih dơ̆ng, hơnăp jang, tơdrong jang đơ̆ng Kuôk hô̆i, Anih chĕp kơ̆l pơgơ̆r Kuôk hô̆i, Anih vei lăng hơdrĕch kon kông, dôm anih jang kơ Kuôk hô̆i, Khul tang măt Kuôk hô̆i, bơngai tang măt Kuôk hô̆i păng Jơnŭm pơgơ̆r kon pơlei.