Lơ̆m 11 khei kơ xơnăm 2022, lkhul kơpal kơ dêh char Kon Tum hlôi ƀôh đei 83 'măng pơm glăi Luơ̆t vei lăng bri, thu iŏk hloh 419m3 tơ̆r lơ kơloăi, hơgăt bri ƀơm pơrăm hloh 32ha. Tơ̆ 'măng apinh jet Hô̆i đŏng kon pơlei dêh char Kon Tum, lơ bơngai tang măt xơkơ̆t hlôi đei tơdrong pơhơi lơ̆m tơdrong vei hơlen, ưh đei tơnăp hăm xơnong jang păng phŏ noh tơgŭm ăn khul tơtông bri hloi.

Tơl nơ̆r hăm Hô̆i đŏng kon pơlei dêh char, đe kơdră kơpal kơ Anih vei lăng kon pơlei dêh char  Kon Tum xơkơ̆t, lê̆ đei tơdrong pơm glăi Luơ̆t vei lăng bri noh kơyuơ đơ̆ng tơdrong pơgơ̆r đơ̆ng dôm jăl jang, jơnŭm pơgơ̆r tơ̆ minh ƀar tơring tam mă pơm jang tơnăp; Oei đei tơdrong pơhơi lơ̆m vei hơlen, tơgŭm ăn dôm bơngai tơtông, chơ glăi 'long bri. Anih vei lăng kon pơlei dêh char gô pơtoi pơgơ̆r rim anih jang păng rim tơring kơtă noh apŭng păng xăh vă vei xơđơ̆ng bri. Hơtŏk xơnong jang kơ tơm bri păng khul jang vei bri. Hơtŏk hloh dơ̆ng tơdrong hơlen kăp gĭt ăh rim pơyan muih choh jang mir.