Brŏ re đơđŭk, ƀrŭng ƀrăng ŭnh pơchrang ‘lơ̆ng rŏ, lơ̆m hơnih tĕch đei pơrŏ hăm um rup dôm tơmam cheh phe ‘lơ̆ng kơ phô̆ kông Pleiku, dôm bơngai jang kơ Kŏng ti TNHH BaKa (Pleiku, Gia Lai) rơ rông roi tơƀôh tơmam. Yă Nguyễn Thị Thanh, Phŏ Kơdră vei lăng kŏng ti roi tơbăt, tơdrong jang ‘nâu hlôi pơgơ̆r rim năr lơ̆m prăt vă jê̆ 2 sơnăm ‘nâu. ‘Nâu kŭm jing hơyăk ‘lơ̆ng tơgŭm anih mơdro sa roi tơƀôh păng hơnhăk tơmam ‘lơ̆ng Gia Lai truh tơpang ti bơngai răt yua tơ̆ jơ̆p lơ̆m teh đak. Lăp lơ̆m khei ‘năr kơđeh, kơdeng tơmam đơ̆ng anih mơdro sa hlôi sơng đei rơbâu ‘nu bơngai kiơ̆ hơlen, đei hơlen lăng hloh 4,2 hơ nglŏng. Yă Nguyễn Thị Thanh roi tơbăt, kŭm hăm pơih să anih tĕch mơdro, anih mơdro sa kŭm hơtŏk trong jang pơm tơlĕch, hơtŏk ‘lơ̆ng tơmam, pơm ming ‘lơ̆ng tơpu tăh păng lăng kăl pơvih pơvăn tơgŭm đơ̆ng rŏng.

“Rim măng, nhôn đei 2 ‘nu buăl tĕch kơ tă lơ̆m mạng đơ̆ng 7 jơ kơmăng truh 10 jơ kơmăng. Mĭnh ‘măng tĕch kơtă adoi đei hơmet ăn pơ ‘lơ̆ng găh ŭnh hơdăh, micro, hla ar chih lê̆ hơdrol. Hơnih tĕch mơdro điện tử ƀôh nhôn bơ̆jang pơnam, đe sư tơgŭm ưh kơ iŏk jên chơ, gơih vă tơmoi răt tơmam kơtă hloi ƀơ̆t oei tĕch kơtă lơ̆m mạng. Hrei ‘nâu, dôm kơdeng tơmam đơ̆ng BaKa lơ̆m hơnih tĕch mơdro điện tử adoi iŏk đei hơlen lăng đơ̆ng 4,5 truh 4,9 hơ nglŏng. Nhôn lui akhan bơ̆jang tơpăt gô iŏk đei jơnei ‘lơ̆ng.”

Kŭm hăm cheh phe, dang ei lơ tơmam ‘lơ̆ng kơ Gia Lai nhen đak kơdrot, tiu, găr điêu đĭ tĕch tơ̆ hơnih tĕch mơdro điện tử, hăm iŏk yua tŏk hơnơ̆ng hloh 8% rim sơnăm. Lơ̆m tơdrong jang tơplih kơsô̆, Gia Lai hlôi tơgŭm anih mơdro sa pơjing 255 website tĕch mơdro điện tử vă hơlen lăng hơnăn, tơchă băt tơm a pơm tơlĕch păng tĕch mơdro lơ̆m kơmăy kơsô̆. ‘Ngoăih kơ ‘noh, hloh 90 tài khoản tĕch tơmam lơ̆m mạng đĭ đei pơ jing ăn kơ 30 anih mơdro sa ‘lơ̆ng. Ƀok Phan Thanh Thiên, Phŏ Kơdră vei lăng Khŭl mơdro sa mơlôh Gia Lai, roi tơbăt:

“’Nâu jĭ hơnih tĕch tơmam ‘lơ̆ng ăn dêh char păng tơring Tây Nguyên. Khŭl gô tơgŭm bơngai jang tơ̆ Gia Lai rim khei hơvơn dôm bơngai gơh hơgei găh tĕch tơmam lơ̆m mạng vă tĕch tơmam, tơgŭm anih mơdro sa tŭn pran iŏk yua.”

Dôm sơnăm âu ki, anih jang găh kơmăy kơmŏk mơdro sa Gia Lai hlôi pơgơ̆r lơ hop akŏm, pơhrăm vă hơtŏk ‘lơ̆ng hlôh vao păng tơdrong jang ăn kơ dôm anih mơdro sa, hơp tak xăh păng kon pơlei lơ̆m tơdrong iŏk yua tĕch mơdro điện tử. ‘Nao âu, Anih vei lăng găh Kơmăy kơmŏk Mơdro sa Gia Lai jang hơdai hăm Jơnŭm mơdro sa mơlôh Gia Lai păng 1 hơnih tĕch mơdro điện tử pơgơ̆r 2 ‘măng tĕch tơmam kơtă lơ̆m mạng. Kăl kơ lăng truh, tơ̆ dôm ‘măng tĕch âu, Kơdră Anih vei lăng găh Kơmăy kơmŏk Mơdro sa hlôi kơtă jang hơdai hăm bơngai răt kŭm hăm bơngai tang măt hơnăn tơmam. Pơtôch, 12.700 hla ar răt tơmam hlôi đei tĕch hăm akŏp kơjă đei 1,8 ti hlak jên. Mă đơ̆ng hloi noh ră, kiơ̆ kơ ƀok Phạm Văn Binh, Kơdră Anih vei lăng găh Kơmăy kơmŏk Mơdro sa Gia Lai, tĕch mơdro lơ̆m điện tử tơ̆ dêh char oei lơ̆m khei ‘năr pơtơm jang blŭng. Dang ei ‘nao đei 40% lơ̆m akŏp kơsô̆ 5.000 anih mơdro sa tơ̆ dêh char đei website tĕch mơdro lơ̆m điện tử. Mă lei pơtôch dôm ‘măng tĕch tơmam kơtă lơ̆m mạng âu ki ăn ƀôh, tơmam đơ̆ng choh jang sa Gia Lai đei tơdrong ‘lơ̆ng hơnhăk ăn iŏk yua lơ lơ̆m dôm hơnih tĕch mơdro điện tử:

“2 ‘măng tĕch kơtă lơ̆m mạng âu ki ăn ƀôh tơdrong bơngơ̆t truh tôch kơ lơ đơ̆ng tơmoi răt tơmam. Tơdrong ‘nâu tơƀôh hơdăh akhan tơdrong jang tĕch mơdro lơ̆m điện tử, mă đơ̆ng oei ‘nao, oei đei tơmam ‘lơ̆ng tih tơ̆ Gia Lai. Nhôn gô hơdai hăm TikTok păng Shopee vă pơjing dôm năr tĕch tơmam, giĕng lêh tĕch tơmam tih kiơ̆ hơnăn găh tơmam đơ̆ng choh jang sa đei kơ Gia Lai. Hrei ‘nâu, Anih vei lăng găh Kơmăy kơmŏk Mơdro sa tŏk bŏk apĭnh hăm Anih tơm vei lăng găh Kơmăy kơmŏk pơjing hơnih tơmam tĕch mơdro điện tử, jing hơnih tơgoăt anih mơdro sa tơ̆ Gia Lai.”

Tĕch mơdro lơ̆m điện tử tŏk bŏk jing gơng tơƀưh gĭt kăl, hơnhăk tơmam đơ̆ng choh jang sa đei Gia Lai yak hơtăih đơ̆ng anih tĕch mơdro lơ̆m teh đak truh tĕch mơdro jơ̆p plei teh. Gơnang đơ̆ng hơbĕch hơbal păng tơgĕch yua tơdrong ‘lơ̆ng đơ̆ng tĕch mơdro điện tử păng tơplơ̆ dơ̆ng, dôm nơ̆r tơl tơroi đơ̆ng tơmoi kŭm tơgop tơgŭm anih mơdro sa păng kon pơlei jang chŭn mir roi ‘năr roi pơvei hơlen hloh ăn tơmam đơ̆ng kơdih. ‘Nâu jĭ pơih blŭng ƀĕnh tơdrong hơmĕng ăn 1 tơdrong choh jang sa ‘nao păng kơjăp tơ̆ tơring.