Pơgê năr 1/12, Tổng Bí thư Tô Lâm hăm hơkăn ƀok păng Khul kơdră kơpal teh đak bơ̆n năm  truh tơ̆ Hơnih tơm Vientiane, iung năm tơmang Teh đak Lào, vang năm Pơm lêh tơbăt 50 sơnăm năr Quốc khánh Lào păng vang chĕp pơgơ̆r ‘Măng tơƀơ̆p dil băl Khul kơdră kơpal ƀar păh Đảng Cộng sản Việt Nam hăm Đảng Kon pơlei Cách mạng Lào. Pơm lêh sơng, Tổng Bí thư Tô Lâm hăm hơkăn ƀok păng Khul kơdră kơpal teh đak bơ̆n đei pơgơ̆r tơ̆ Hơnih bơ̆ jang Kơdră chĕp pơgơ̆r Teh đak kiơ̆ trong pơgơ̆r ‘măn ăn Kơdră tơm dơnơm teh đak. Tổng Bí thư, Kơdră chĕp pơgơ̆r Teh đak Lào Thongloun Sisoulith pơm tơm pơm lêh sơng. ‘Măng iung năm bơ̆ jang đơ̆ng Tổng Bí thư Tô Lâm jĭ hơyak kăl kơ ƀar teh đak mă lei jei tơƀôh hơdăh dôm tơdrong atŏk tơ iung ‘lơ̆ng hơ iă tơgoăt tơgoăl ‘nhŏng oh Việt - Lào, đei long kiơ̆ ‘măng tơblăh vang hrang tơƀet mơmat tat hrat hrĭn truh tơ iung pơjing, vei lăng, atŏk tơ iung teh đak kơ ƀar hơdrĕch hơdrung, vă đơ̆ng noh sơkơ̆t hơdăh tơgoăt tơgoăl ‘lơ̆ng hơ iă, hui kơ đei lơ̆m tơgoăt tơgoăl apŭng plĕnh teh. ‘Măng năm bơ̆ jang ‘măng mă ou đơ̆ng Tổng Bí thư Tô Lâm sơkơ̆t hơdăh hơdrin đĭ ai đơ̆ng ƀar Đảng, ƀar Teh đak lơ̆m tơdrong hơnơ̆ng vei răk, atok tơ iung tơgoăt tơgoăl ‘lơ̆ng hơ iă kơ yuơ rơngei hiôk hian, sơđơ̆ng păng atŏk tơ iung kơjăp iăp kơtang kơ ƀar teh đak păng lơ̆m tơring.