Hà Nội iŏk đei jơnei hơ iă hăm GRDP tŏk 8,22%, thuê̆ ăn hơnih mong jên bơ̆ jang teh đak hloh 404.000 ti hlak jên, tơlĕch kon jên teh đak tơmơ̆t jên jang hloh 63.000 ti hlak jên. Hôn bơnê dôm tơdrong hơdrin đơ̆ng pơlei tơm lơ̆m pơm pơkeh trong bơ̆ jang, atŏk tơ iung trong hnam, hơmet pơ ‘lơ̆ng trong bơ̆ jang păng hơmet pơ ‘lơ̆ng cham char atŏk tơ iung. Tổng Bí thư, Kơdră chĕp pơgơ̆r Teh đak athei Hà Nội akŏm iung jang 8 tơdrong jang tơm lơ̆m 6 khei hơtuch sơnăm, lăng tŏk mŭk drăm ƀar kơsô̆ jĭ tơdrong jang chinh trĭ gĭt kăl hloh. Mă hơdăh, Hà Nội kăl pơjing đei hơyak pran kơtang găh khoa hŏk, kmăi kmŏk, tơplih ‘nao tơchăr, tơplih kơsô̆ păng pơjing khul bơ̆ jang hơgei. Hà Nội kăl yak hơlou lơ̆m tơ iung pơjing tơdrong jang mŭk drăm ‘moi kiơ̆ khul gơh hơgei, yưh lĭu păng tơchăr, atŏk kơtang hơmet pơ ‘lơ̆ng, tơƀưh păng iŏk yoa yưh liu yoa atŭm pơvih pơvăn ăn trong chĕp pơgơ̆r, tơdra hơdrol tŏk mŭk drăm, dăr lăng hơlen tơdrong tơmơ̆t jên jang đơ̆ng teh đak, vei lăng groi teh, xek tơlang pơm hla bơar păng vei lăng sơđơ̆ng hơrih sa tơpôl.