‘Moi kiơ̆ hla bơar chih tơbăt tơdrong bơ̆ jang păng nơ̆r tơgop tơ̆ jơ bơ̆ jang, iung pơma pơtôch, Tổng Bí thư, Kơdră chĕp pơgơ̆r Teh đak Tô Lâm pơma hơdăh, bơ̆ jang chă tơchĕng hơlen khoa hŏk kăl đei tơplih ‘nao kơtang găh tơdrong hlôh vao, trong jang, trong tơmơ̆t jên jang, pơgơ̆r jang kiơ̆ păng trong chĕp pơgơ̆r vă trŏ lăp hăm tơdrong ‘meh vă atŏk tơ iung teh đak lơ̆m chăl hle. Pơma truh dôm tơdrong kăl iung jang hloi, Tổng Bí thư, Kơdră chĕp pơgơ̆r Teh đak Tô Lâm pơjao ăn Đảng ủy Khul kơdră chĕp pơgơ̆r teh đak pơm tơm, pơrô̆ iung jang akŏm lơ̆m 9 tơdrong jang, tĕnh koăng tơ iung pơjing Trong jang kăl teh đak găh atŏk tơ iung chă tơchĕng hơlen khoa hŏk gĭt kăl truh sơnăm 2045. Trong jang kăl kăl hơlen mă hơdăh hơnih dơ̆ng, trong tơlĕch jang hơdrol, trong chĕp pơgơ̆r, tơdrong jang găh jên hu, trong lăng hơlen păng trong iung jang kiơ̆; rơih ƀlep tơdrong tơm, tơmơ̆t jên jang tôm ăn đunh đai, tơklep hăm trong tơlĕch ăn atok tơ iung tĕnh koăng, kơjăp păng iung jang kơtang.