Vang năm hop akom đei Thủ tướng Lê Minh Hưng, Kơ iĕng Hơnih chĕp pơgơ̆r; Kơdră chĕp pơgơ̆r Ban Bí thư Trần Cẩm Tú, Kơ iĕng kơdră Hơnih chĕp pơgơ̆r atŭm hăm rim kơdră. Tơ̆ Hop akŏm, rim kơdră tang măt pơma dơnuh, tơgop nơ̆r găh 6 tơdrong, đei: iung jang tih dăr lăng hơlen rim hla bơar tơchơ̆t khôi luơ̆t; Tơdrong vă jang kăl pơm pơkeh khôi luơ̆t Việt Nam lơ̆m chăl ‘nao; pơm hơtŏk jơnei jang kiơ̆ khôi luơ̆t păng pơtrŭt kơtang tơdrong joăt pơm kiơ̆; hơmet ming Khôi luơ̆t tơm Hình sự păng Khôi luơ̆t Hơnih jang bơ̆ jang dăr lăng hinh sư̆; trong jang xek tơlang pơm glăi păng xek tơlang tơdrong kon pơlei tơgar dih băl. Iung pơma pơrô̆, Tổng Bí thư, Kơdră chĕp pơgơ̆r Teh đak Tô Lâm pơma hơdăh, bơ̆ jang tơ iung pơjing păng jang kiơ̆ khôi luơ̆t kăl tơgop hơmet pơ ‘lơ̆ng tơdrong tơhlăk tơhlĭn, pơm tơjur kon jên jang kiơ̆, hơmet pơ ‘lơ̆ng khul jang, sơđơ̆ng tơdrong pơm tơm păng đei iŏk yoa trŏ lăp kơ kon pơlei, hơnih mơdro sa, pơjing hơyak pran atŏk tơ iung mŭk drăm-tơpôl, vei kơjăp sơdơ̆ng teh đak.