Iung pơma tơ̆ ‘măng hop akŏm, Tổng Bí thư, Kơdră chĕp pơgơ̆r Teh đak Tô Lâm pơma hơdăh tơdrong kăl hloh kơ tơdrong oei sa ‘lơ̆ng, sơkơ̆t hơdăh ‘nou jĭ jơhngơ̆m đon kơjăp kơ tơpôl, jĭ trong kăl vă atŏk tơ iung teh đak pran kơjăp; Athei Hơnih chĕp pơgơ̆r kăl hơnơ̆ng tơlĕch jang kiơ̆ kơjăp rim tơdrong tơchơ̆t đơ̆ng Đảng, mă kăl ‘noh nơ̆r pơma pơtôch đơ̆ng nhap Tổng Bí thư Nguyễn Phú Trọng tơ̆ Hop akŏm Tơdrong oei sa ‘lơng lơ̆m teh đak sơnăm 2021. Ƀok pơkă tơdrong tơ iung pơjing kon bơngai Việt Nam lơ̆m chăl hle tơklep kơjăp hăm vei răk tơƀăk mong tơdrong oei sa ‘lơ̆ng hơ iă sơ̆ ki kơ hơdrĕch hơdrung păng tơgoăt iŏk dôm tơdrong oei sa gơh hơgei ‘lơ̆ng liem kơ kon bơngai. Adoi kăl akŏm pơm pơkeh tơdrong tơchơ̆t, trong tơgŭm, hơvơn kơtang rim khul tơpôl vă tơmơ̆t ăn tơdrong oei sa joh ayŏ, hơnhăk tơdrong oei sa joh ayŏ joăt joe mơ̆t hlom lơ̆m rim tơdrong kơ hơrih sa, pơjing đei jơhngơ̆m pran ăn jang kiơ̆ jơnei trong tơlĕch jang atok tơ iung teh đak.