Tơ̆ pơma đam, Tổng Bí thư, Kơdră chĕp pơgơ̆r Teh đak Tô Lâm sơkơ̆t hơdăh ‘meh vă hơnơ̆ng hơmet pơ ‘lơ̆ng, pơm hơtŏk jang hơdoi ou, vă pơjing dơ̆ng đei lơ tơdrong iŏk đei jơnei tơpă păng kơjăp ‘lơ̆ng ăn kon pơlei ƀar teh đak. Jang hơdoi muk drăm, mơdro sa păng tơmơ̆t jên jang jĭ tơdrong jang pran kơtang hloh, jĭ jrăng tơm kơjăp iăp kơtang ăn tơgoăt dih băl ƀar teh đak. Việt Nam tok bŏk hơdrin pơtrŭt kơtang vă tơgoăt jang hơdoi ou đei jing hơtŏ dih băl hloh lơ̆m dôm sơnăm kơnh. Tổng Bí thư, Kơdră chĕp pơgơ̆r teh đak Tô Lâm sơkơ̆t hơdăh, Việt Nam pơkăp vei kơjăp sơđơ̆ng chinh trĭ-tơpôl, pơjing sơđơ̆ng jơhngơ̆m ăn rim trong tơlĕch vă jang đunh đai kơ hơnih mơdro sa; atŏk kơtang hơmet pơ ‘lơ̆ng trong bơ̆ jang, hơnơ̆ng dăr lăng, kăt tơjur rim tơdrong pơm hla bơar, xek tơlang rim “hơnih tơhlăk tơhlĭn” vă tơ iung pơjing trong pơkăp hơdăh ‘lơ̆ng, vei lăng tơdrong đei iok yoa sa hơpăh trŏ lăp kơ rim hơnih tơmơt jên jang, tĕch tơlĕch tôm tong, sơđơ̆ng ŭnh hơyuh, đak, kmăi kmŏk pơre nơ̆r, hơnih teh păng khul bơ̆ jang.