Pơma ah jơ pơm jang, Tổng Bí thư, Kơdră teh đak bơ̆n Tô Lâm ră hơdah, khei năr ou ki, mă kơsô̆ 'măng pơm glăi lơ̆m tơdrong jang hanh chĭnh, roi năr roi tơnap tap, rim jăl jang, hơnih jang đảng păng hơnih jang khôi luơ̆t hlôi đei lơ hơdrin, vă jang đei jơnei 'lơ̆ng. Mă lei, tơdrong sek tơlang adoi oei đom lơ, pơdui đunh khei năr tam mă đei hơmet tơnăp. Tổng Bí thư, Kơdră teh đak bơ̆n Tô Lâm pơtruh nơ̆r athei hơtŏk tơdrong pơgơ̆r đơ̆ng Đảng hăm tơdrong jang tang găn, sek tơlang tơdrong tơgar dih băl lơ̆m tơpôl, hanh chĭnh păng tơdrong sek tơlang.

Atŭm hăm noh athei pơtoi keh đang chih akŏm khôi luơ̆t, vei sơđơ̆ng sơnong ăn kon pơlei gơh đei vei vêr đơ̆ng tang găn tơdrong tơgar truh tơdrong sek tơlang, hơmet dôm hla bar ưh kơ kăl mă pơm pơdui đunh lơ̆m tơdrong sek tơlang. Tổng Bí thư, Kơdră teh đak bơ̆n pơgơ̆r dôm hơnih jang dah tenh kuăng pơm kiơ̆ dôm sơnong jang đei tơrĕk; tơdrong jang hlôi hơdah noh athei jang hloi, tơdrong oei tơhlăk noh pơklaih hloi, ưh đei tơpŭ ăn dih băl. Rim tơdrong jang athei sơkơ̆t hơdah hơnih pơgơ̆r jang, hơnih jang hơdoi, tơmam drăm păng khei năr pơm tơlĕch.