Hop akŏm hơvơn đei lơ khul tang măt kơpal, đe kơdră kơ jơnŭm pơgơ̆r teh đak, kơdră kơ dôm hơnih jang gah rơvơ̆ng plenh kơ teh đak, rim hơnih jang apŭng plenh teh, rim hơnih jang mŭk drăm, bơngai jang hơlen gah rơvơ̆ng plenh truh đơ̆ng pơhlom 130 teh đak lơ̆m kơpal teh; păng chô̆ pơtoi kơtă hăm Hơnih jang gah Rơvơ̆ng plenh kơ apŭng plenh teh ISS. Hop akŏm đei lơ tơdrong pơma đam gah tơchơ̆t tơgŭm, tơroi gah jang hơdoi apŭng plenh teh hăm trong jang, kơmăi kơmŏk chih akŏm hơlen pơtho pơhrăm gah rơvơ̆ng plenh, vei sơđơ̆ng tơpôl lơ̆m rơvơ̆ng plenh păng hơtŏk jang hơdoi vă hơlen lăng rơvơ̆ng plenh lơ̆m khei năr hơnô̆ hơnăp kơnh ăn kon bơngai.

Pơma pơih blŭng ăn 'Măng pơma đam, Tổng Bí thư, Kơdră teh đak bơ̆n Tô Lâm hlôi tơroi 5 tơchơ̆t vei lăng lơ teh đak hăm rơvơ̆ng plenh, hơvơn nĕ iŏk tơdrong pran vă pơjuă dih băl, pơkăp kon bơngai păng plei teh jing tơm dơnơm. Ƀok pơtruh nơ̆r kiơ̆ kơ noh Việt Nam atŭm hăm Phalăng, Liên hơp kuô̆k, ASEAN păng dôm teh đak vang jang hơlen chih akŏm tơdrong jang "Rơvơ̆ng plenh kơyuơ Hơtŏk tơ-iung păng kĕ sơ̆n", akŏm lơ̆m tơdrong tơroi lơ̆m iŏk yua tơdrong chih akŏm gah rơvơ̆ng plenh kơyuơ tơdrong hơtŏk tơ-iung, hơtŏk hơgei lơ̆m vei sơđơ̆ng kơjăp rơvơ̆ng plenh păng pơtoi tơgŭm dih băl lơ̆m chih akŏm – pơtho pơhrăm – hơnih jang mŭk drăm – asong jang vă hơtŏk mŭk drăm rơvơ̆ng plenh. Tơdrong jang hơdrol hloh noh akŏm tơ̆ tơring Đông Nam Á mă Việt Nam kơchăng pơm hơnih tơroi pơtoi dih băl.