Tang măt ăn kơdră Đảng, Teh đak, Tổng Bí thư, Kơdră teh đak bơ̆n hlôi pơjao Tơchơ̆t đơ̆ng Kuô̆k hô̆i gah pơjing pơlei tơm Đồng Nai păng pơjao Mê đai Pơm jang tăl mă Mônh ăn Đảng ƀô̆, jơnŭm pơgơ̆r tơring păng kon pơlei pơlei tơm. Pơma ah jơ lêh, Tổng Bí thư, Kơdră teh đak bơ̆n ră hơdah, lơ̆m dôm tơdrong iung tơjră sơ̆, Đồng Nai jĭ um pơtih kơ đon bơnôh nuih mơng, toguăt kơjăp hăm Đảng, Teh đak păng kon pơlei.

Đơ̆ng tơring teh akŏm ƀenh juăt jue kăch mang, Đồng Nai hlôi hơtŏk jing minh lơ̆m dôm hơnih jang kŏng ngĭp, tơring kơdrơ̆m păng jang hơdoi kăp gĭt kơ jơ̆p teh đak. Tơdrong đei jing pơlei tơm pơkăp lơ̆m Trung ương pơih minh jăl trong hơtŏk tơ-iung 'nao, athei pơkăp gah trong pơm jang, hơtŏk tơdrong pơgơ̆r jang kiơ̆ trong 'nao păng sơnong trăp trĭn hloh hăm kon pơlei, pơkăp hơ-'nhăk Đồng Nai oei lơ̆m grŭp dôm pơlei tơm tơgăl kơ hơrih xa, tơgăl kơ pơm jang kơ tơring châu Á păng apŭng plenh teh.