Sơkơ̆t hơdah Việt Nam ling lang lăng Hoa Kỳ jĭ teh đak kăp gĭt vang jang hơdoi, Tổng Bí thư, Kơdră teh đak pơtruh nơ̆r: 2 pah pơtoi tơlĕch lơ trong jang đei jơnei kiơ̆ Pơkăp jang hơdoi tôm tơdrong, hơtŏk jang hơdoi gah vei sơđơ̆ng tơpôl teh đak, trŏ ƀlep hăm kăl păng pơyua kơ rim teh đak.

Ră hơdah tơdrong kăp gĭt kơ jang hơdoi hơmet răm đơ̆ng tơblah vang pơm đei, Tổng Bí thư, Kơdră teh đak bơ̆n pơtruh nơ̆r hăm Hoa Kỳ pơtoi iŏk jang păng pơih să dôm tơdrong jang pơm brai pơnhŭl dioxin, hơlen plôih ƀôm min, tơgŭm bơngai hơve hơvo jo jăn; hơtŏk tơroi ăn dih băl gah trong jang kơmăi kơmŏk 'nao, tơroi tơbăt vă chơ chă, sơkơ̆t hơdah hơnăn măt linh lôch tang Việt Nam. Ƀô̆ trương Hùng Cao sơkơ̆t hơdah Hoa Kỳ lăng tơgĭt tơdrong tơbôl hăm Việt Nam, tơgŭm ăn minh Việt Nam pran kơtang, rơngei hiôk hian, hơtŏk tơ-iung păng hơpơi 'meh pơih să jang hơdoi 2 pah, lơ̆m tơring păng lơ̆m apŭng plenh teh.