Thơ thou hăm rim Kơdră jang tang măt iŏk sơnong jang 'nao, Tổng Bí thư, Kơdră teh đak bơ̆n sơkơ̆t hơdah Việt Nam ling lang lăng tơgĭt tơdrong jang tơbôl, jang hơdoi hăm dôm teh đak, hơpơi 'meh atŭm hơtŏk jang tơbôl roi năr roi hơtŏk tơpă, jang đei jơnei lơ̆m tôm tơdrong jang.

Lơ̆m jơ sơng pơma dơnuh, Tổng Bí thư, Kơdră teh đak bơ̆n pơtruh nơ̆r hăm rim Kơdră tang măt pơm gơng tơroh vă hơtŏk asong khŭl kơpal pơma đam pơm jang hơdoi dih băl, pơih să jang hơdoi gah mŭk drăm, tĕch pơdro, asong jang, pơtho pơhrăm, joh ayŏ păng hơpeh hơpong kon pơlei; atŭm hăm noh hơtŏk jang hơdoi lơ̆m lơ tơdrong hop akŏm lơ̆m tơring păng lơ̆m apŭng plenh teh. Rim kơdră jang tang măt chơt hơ-iă đei asong jang tơ̆ Việt Nam, sơkơ̆t hơdah gô hơdrin hơtŏk jang tơbôl, jang hơdoi đơ̆ng teh đak po hăm Việt Nam, tơgop hơtŏk tơdrong jang tơbôl 2 pah hơtŏk kơtang hloh lơ̆m khei năr truh.