Hop akŏm chô̆ pơdah hăm jê̆ 35.000 hơnih lơ̆m jơ̆p teh đak. Năm akŏm păng pơma pơgơ̆r ah hop akŏm, Tổng Bí thư, Kơdră teh đak bơ̆n Tô Lâm ră hơdah, Tơchơ̆t kơsô̆ 10 tơƀôh hơdah tơdrong tơplih lơ̆m đon tơchĕng hơtŏk tơ-iung, pă đei oei pơih 'măng sơng jên jang bơih mă kơchăng rơih iŏk păng yua tơdrong tơgŭm đơ̆ng apŭng plenh teh vă pơjing tơdrong tơgar jang kơ teh đak. Đơ̆ng rŏng kơ tơbang hơdah dôm tơdrong oei tơjruh lơ̆m tơdrong hơvơn jên jang  FDI lơ̆m khei năr ou ki, Tổng Bí thư, Kơdră teh đak bơ̆n Tô Lâm sơkơ̆t hơdah, Tơchơ̆t 10 tơlĕch dôm tơchơ̆t kơjung hloh: hơtŏk mŭk drăm đei jên asong jang đơ̆ng teh đak đe athei tơguăt hăm hơtŏk tơdrong gơh jang dơnơm, hơtŏk tơdrong pơm jang, kơmăi kơmŏk 'nao păng jơhngơ̆m pran tơgar jang mŭk drăm; hơdrin truh sơnăm 2030 Việt Nam oei lơ̆m grŭp chĕp kơ̆l lơ̆m ASEAN gah tơdrong asong jang tĕch pơdro, tơgar jang, tơplih 'nao gơh hơgei, hơtŏk tơdrong jang tĕch pơdro păng sơng iŏk dôm tơdrong jang đơ̆ng teh đak đe gơh hơgei.

Tổng Bí thư, Kơdră teh đak bơ̆n Tô Lâm ră hơdah, khŏm mă sek tơlang tơdrong tơhlăk tăk, hla bar ưh đei hơdah. Ưh đei lê̆ hơnih asong jang athei găn lơ 'măng pơm jang, hiong lơ jơ năr păng jên huach vă pơtơm minh tơdrong jang trŏ luơ̆t. Tơchơ̆t kơsô̆ 10 hlôi sơkơ̆t hơdah 6 tơdrong pơgơ̆r tơm, 6 tơdrong tơplih tih tên gah đon tơchĕng hơtŏk tơ-iung păng tơlĕch tơchơ̆t truh sơnăm 2030 hơvơn đei 200-300 tih đôlar jên asong jang kơtă đơ̆ng teh đak đe. Sơkơ̆t jang truh sơnăm 2045, Việt Nam jing hơnih pơm jang dơnơm gah pơm tơlĕch, tĕch pơdro, tơplih 'nao gơh hơgei păng pơgơ̆r tơring jang kơ lơ hơnih jang truh đơ̆ng lơ teh đak.