Pơgê năr 21/9, kiơ̆ jơ tơ̆ tơring, tơ̆ pơlei tơm New York, Tổng Bí thư, Kơdră teh đak bơ̆n Tô Lâm atŭm hăm Khul kơpal tang măt ăn Việt Nam tơƀơ̆p pơma dơnuh hăm Jơnŭm bơngai juăt jang păng Sinh viên Việt Nam tơ̆ Hoa Kỳ atŭm hăm rim bơngai juăt jang, bơngai hŏk kơjung kơ Việt Nam tŏk bŏk oei pơm jang tơ̆ Hoa Kỳ. Pơhlom 40 'nu tang măt pơm jang gah tơdrong jang kơ̆l 'ngok hơgei đơ̆ng kon bơngai, chih akŏm tơdrong kăl, jang gah gre păr ưh đei bơngai vơ̆r, pơm tơlĕch phân mêm, tơchơ̆t jang kŏng, jên hu, pơtho pơhrăm păng luơ̆t apŭng plenh teh vang truh pơma dơnuh. Rim bơngai juăt jang pơtruh lơ trong jang vă hơtŏk sơnong jang kơ Việt Nam lơ̆m hơtŏk kăp gĭt kơ̆l 'ngok hơgei kon bơngai lơ̆m kơpal teh, hơvơn lơ jên asong jang lơ̆m apŭng plenh teh, atŭm hăm noh akŏm đei khul bơngai Việt tơ̆ teh đe păng lơ̆m teh đak hŏk pơhrăm kơjung.

Pơma tơ̆ jơ tơƀơ̆p, Tổng Bí thư, Kơdră teh đak bơ̆n Tô Lâm bơnê kơ dôm nơ̆r tơgop hơdah 'noh, ră hơdah tơdrong kăl vă rim bơngai hơlen chih akŏm khua hŏk, tơchăr hơgei păng tơgop ăn kơ teh đak. Tổng Bí thư, Kơdră teh đak bơ̆n akhan: bơngai Việt Nam tơ̆ teh đak đe 'noh ưh gơh tơklah kơ hơdrung hơdrĕch kon pơlei Việt Nam păng jĭ jơhngơ̆m pran păng trong jang kăp gĭt. Rim hơnih jang lơ̆m teh đak kơchăng tơmơ̆ng, hơvơn bơngai juăt jang vang jang đơ̆ng hrôih lơ̆m chih tơlĕch trong jang, sơnong jang hơlen chih akŏm păng tơdrong pơtho pơhrăm, kiơ̆ đơ̆ng noh iŏk jang pơyua hloh tơdrong gơh hơgei hŏk kơjung đơ̆ng bơngai Việt Nam tơ̆ teh đak đe.