Hơnơ̆ng bơ̆ jang dôm tơdrong jang lơ̆m ‘măng năm ngôi tơ̆ teh đak Philippines, kơsơ̆ 31/5 (kiơ̆ jơ tơ̆ tơring), Tổng Bí thư, Kơdră teh đak Tô Lâm kŭm hăm hơkăn ƀok păng khul tang măt ăn teh đak bơ̆n truh akŏm păng pơgơ̆r jơ tơƀâp khul tơpôl, bơngai tĕch mơdro păng bơngai juăt jang kơ Việt Nam tơ̆ Philippines. Pơma nuh tôch hơiă hăm dôm bơngai tang măt, Tổng Bí thư, Kơdră teh đak pôk pơ ư dôm tơdrong adrin đơ̆ng tơpôl bơngai Việt tơ̆ Philippines lơ̆m khei ‘năr mât jang hơdoi hăm tơpôl tơ̆ âu, vei kơjăp tơdrong juăt ‘lơ̆ng kơ hơdrĕch hơdrung, đei lơ tơdrong jang vang tưk tơiung mŭk drăm tĕch mơdro đơ̆ng 2 teh đak.

Pơma hơdăh lơ̆m dôm ‘măng tơƀâp hăm kơdră chĕp kơ̆l teh đak Philippines, Tổng Bí thư, Kơdră teh đak hơnơ̆ng athei Khul kơdră teh đak Philippines tơrek truh, tơgŭm ăn kon pơlei đei anih gơnang hơđơ̆ng, đei tơdrong arih xa sơđơ̆ng, ‘lơ̆ng hơiă, mât hơdoi hăm tơpôl tơ̆ teh đak ‘nâu. Tổng Bí thư, Kơdră teh đak pơma hơdăh trong jang ưh đei tơplih đơ̆ng Đảng păng teh đak ‘nŏh jĭ hơnơ̆ng pơngơ̆t, hue lăng truh tơ̆ tơpôl bơngai Việt Nam oei xa tơ̆ teh đak đe, năng tơpôl jĭ 1 păh ưh gơh tơpleh, jĭ 1 khul gĭt kăl lơ̆m hơdrĕch hơdrung Việt Nam. Păng tơ̆ hơnăp kơnh, mĭnh kơsô̆ tơdrong tơgŭm hăm bơngai Việt Nam tơ̆ teh đak đe hơnơ̆ng đei hơmet ming vă pơjing tơdrong ‘lơ̆ng, hiôk hian ăn kon pơlei bơ̆n oei xa tơ̆ teh đak vang tơgop roi lơ ƀiơ̆ ăn pơlei pơla, teh đak.