Pơtôch jơ bơ̆jang, Tổng Bí thư, Kơdră teh đak Tô Lâm hơlen lăng, tơ̆ hơnăp kơnh kăl athei hơlen lăng ‘lơ̆ng bơngai jang, athei tơplih đơ̆ng lăng kăl kơsô̆ lơ jing lăng kăl găh tơdrong ‘lơ̆ng, jơnei iŏk yua păng tơdrong tơgop lơ păng jang đei lơ. Tổng Bí thư, Kơdră teh đak Tô Lâm tơ tă, tơring kon pơlei kon kông păng groi kông đei hơnih tôch kơ gĭt kăl găh mŭk drăm tơpôl, khŭl lĭnh, sơđơ̆ng, cham char bri brăh păng grŭp tơgoăt đĭ đăng hơdrĕch hơdrŭng.

Bơngai jang tơring âu ‘noh jĭ bơngai jang vă hơtŏk tơiung gĭt kăl mă lei kŭm oei lơ mơmat tat găh hlôh vao, gơh jang, nơ̆r yuăn, anih jang kăl, kơtơ̆ng ang mơdro sa, tơdrong gơh hŏk, tŏk iŏk jên, pơvih pơvăn tơdrong jang; athei pơjing tơdrong jang kơjăp tơring kon pơlei kon kông tơklep hăm tơiung đơ̆ng kơdih tơ jur dơnuh hin kơjăp păng chĕp vei tơdrong ‘lơ̆ng hơiă joh ayŏ yua kơ bơ̆jang kơjăp kơ tơring kon pơlei kon kông ưh khan lăp jing trong jang tơgŭm bơngai jang mă oei jing trong jang tơgŭm hơdrĕch kon kông, trong jang tơgŭm tơ jur dơnuh hin, trong jang tơgŭm hơtŏk tơiung kon bơngai păng hơmet ming đon lui đơ̆ng kon pơlei.