‘Nâu jĭ ‘măng năm ngôi mă blŭng đơ̆ng kơdră chĕp kơ̆l gĭt kăl hloh kơ Việt Nam truh tơ̆ New Zealand đơ̆ng rŏng 2 teh đak pơtơm hơtŏk tơdrong pơvei 2 pang tŏk Jang hơdai Gĭt kăl Tôm tơdrong lơ̆m sơnăm 2025 ƀlep ƀơ̆t tơbăt 50 sơnăm pơjing tơdrong pơvei, lơ̆m khei ‘năr tơdrong pơvei 2 teh đak tŏk bŏk hơnơ̆ng hơtŏk tơiung ‘lơ̆ng, sơđơ̆ng kiơ̆ lơ̆m tơdrong lui ngeh chĭnh trĭ ‘lơ̆ng păng đon lui gĭt kăl đơ̆ng 2 teh đak roi ‘năr roi đei hơmet ming.

‘Măng năm ngôi, bơ̆jang tơƀôh hơdăh trong jang tơgŭm ‘lơ̆ng đơ̆ng Việt Nam lăng kăl tơdrong pơvei hăm New Zealand - minh teh đak jang hơdai hiôk, đei lơ tơmam ‘lơ̆ng tơ̆ tơring Pơbăh Thái Bình Dương, hơdai hăm jing tơdrong ‘lơ̆ng hơnhăk pơvei jang Hơdai gĭt kăl Tôm tơdrong đơ̆ng Việt Nam păng New Zealand hơtŏk tơiung pran kơtang, tơpă păng đei yua hloh dơ̆ng lơ̆m jăl jang ‘nao. Tơchĕng hơdrol lơ̆m 2 năr, Tổng Bí thư, Kơdră teh đak Tô Lâm gô pơma đam hăm Kơdră chĕp kơ̆l teh đak New Zealand Cindy Kiro; Pơma đam hăm Thủ tướng Christopher Luoxon; Pơma dơnuh hăm Kơdră Quốc hội NewZaeland; vang akŏm păng pơma tơ̆ Hop akŏm Pơtho pơhrăm đăi hŏk păng Pơtho pơhrăm tơdrong jang Việt Nam - New Zealand; Tơƀơ̆p kang ƀô̆, bơngai jang kơ Anih jang tang măt păng tơpôl bơngai Việt Nam tơ̆ New Zealand.