Pơma tơ̆ jơ bơ̆ jang, Tổng Bí thư, Kơdră teh đak Tô Lâm athei Anih chĕp kơ̆l Đảng, ƀok yŏng păng đĭ đăng kăn ƀô̆, linh lơ̆m Sư đoàn linh gre teh 308 pơjing Sư đoàn pran kơjăp găh chinh trĭ, mĭnh jơhngâm hăm Đảng, Teh đak păng Kon pơlei. ‘Nâu jĭ tơdrong gĭt kăl, pơjing jơhngâm pran iung tơblăh đơ̆ng Khul linh bơ̆n.

Yoa thoi noh, Sư đoàn athei năng kăl tơdrong pơtho pơhrăm chinh trĭ, chĕp kơ̆l vei lăng đon tơchĕng, pơtho tơƀôh tơdrong juăt ‘lơ̆ng đơ̆ng sơ̆; pơm ăn kăn ƀô̆, linh hlôh vao đon tơchĕng, trong jang, jơhngâm đon Ƀok Hô, hưch hanh kơ tơdrong juăt ‘lơ̆ng đơ̆ng sơ̆, hơtŏk hơnăp jang, hơnơ̆ng vei lăng kơjăp jơhngâm đon chinh trĭ, đei đon lui kơjăp hăm tơdrong chĕp kơ̆l pơgơ̆r đơ̆ng Đảng, đon kơchăng adrin tơblăh, chu iŏk jang păng jang đang rim tơdrong tơdăh đei.

Tổng Bí thư, Kơdră teh đak Tô Lâm lui, hăm tơdrong juăt ‘lơ̆ng, hơnơ̆ng “Năm hơdrol, kơtang nuih mơng, mât 1 ƀơ̆r đon, ki luơ̆t, hơbĕch hơbal, tơblăh khŏm đei”, hăm jơhngâm đon hưch hanh kơ Khul linh kơtang nuih mơng, đei lơ tơdrong juăt ‘lơ̆ng, kăn ƀô̆, linh Sư đoàn linh gre teh 308 vă hơnơ̆ng mât 1 ƀơ̆r đon, tơplih ‘nao  rơgei, jang tŏk kơdih, yak hlŏh rim tơdrong pơmat tat, jang đang ‘lơ̆ng rim tơdrong đei pơjao.