Tơ̆ jơ pơma đam, Tổng Bí thư, Kơdră teh đak Tô Lâm pơma hơdăh Việt Nam năng kăl tơdrong pơvei ‘lơ̆ng hơiă hăm Panama; tơchĕng ‘lơ̆ng hơnăp jang đơ̆ng Panama hăm anih dơ̆ng jĭ anih trong tơƀưh đak dơsĭ, trong gre păr, pơvih pơvăn păng jên hu tơ̆ tơring. Tổng Bí thư, Kơdră teh đak Tô Lâm tơƀôh đon lui 2 teh đak hơnơ̆ng tơlĕch jang đei yoa ‘lơ̆ng dôm tơdrong jang hơdoi găh tĕch mơdro, choh jang xa, chơ chuĕn trong đak dơsĭ, gre păr, pơvih pơvăn, tơplih hăm kơmăy sô̆, tưk tơiung tơdrong pơvei 2 pang tŏk kiơ̆ trong roi đunh roi đei yoa păng kơjăp ‘lơ̆ng, yoa tơdrong đei yoa kơ kon pơlei 2 teh đak.

Kơdră tơm José Raúl Mulino pơma hơdăh, Panama năng Việt Nam jĭ teh đak vă pơ ‘nhŏ jang hơdoi tơm tơ̆ tơring châu Á - Thái Bình Dương, ‘mĕh pơm gơng tơƀưh vă Việt Nam pơih xă tơdrong pơvei hăm dôm teh đak Mỹ Latinh. 2 păh oei drơ̆ng nơ̆r hơtŏk tơdrong jang hơdoi vang tang găn tơdrong yoch klĕch tơ̆ teh đak nai păng jang hơdoi lơ̆m dôm khul jang lơ pang. Đơ̆ng rŏng kơ pơma đam, 2 'nu kơdră dơ̆ng lăng lêh pơjao lơ hla ar jang hơdoi găh chơ chuĕn tơmam kiơ̆ trong đak dơsĭ, choh jang xa, chă tơmang lăng, jang gre păr păng pơtho pơhrăm.