Đăi hŏk Quốc gia Hà Nội ‘nao pơm lêh tơbăt 120 sơnăm pơjing păng sơng iŏk mê đai bơ̆ jang dơ̆ng mă mônh. Pơma tơ̆ jơ pơm lêh, Tổng Bí thư, Kơdră teh đak Tô Lâm pơma hơdăh, mât lơ̆m chăl ‘nao, athei jang tŏk hrĕnh păng kơjăp đơ̆ng teh đak, athei Đăi hŏk Quốc gia Hà Nội adrin păng jang tŏk mă pran hlŏh dơ̆ng, tơgăl hăm hơnăp jang jĭ Hnam trưng đăi hŏk teh đak tơm dơnơm.

Tổng Bí thư, Kơdră teh đak hơmĕng, hnam trưng yak hơdrol mưh jang kiơ̆ dôm tơdrong tơchơ̆t đơ̆ng Đảng, vang sek tơlang dôm ƀai toăn tih kơ teh đak, pơm tơ ‘ngla kơmăy kơmŏk nhen kơmăy rơgei, kơmăy bán dẫn, kơmăy sinh hŏk, tơmam ‘nao, unh hơyuh ‘nao păng kơsô̆ chih răk tih. Atŭm hăm ‘nŏh athei dôm tơdrong jang đei pơgơ̆r jang mă pran, jang đei ‘lơ̆ng păng đei yoa, vang tơgop tơpăt ăn tơdrong jang tŏk kơ teh đak.