Tơ̆ jơ sơng, Tổng Bí thư, Kơdră teh đak pơma hơdăh, Việt Nam tơchĕng ‘lơ̆ng hơnăp jang păng dôm tơdrong tơgop đơ̆ng Ấn Độ hăm tơdrong rơngei, hiôk sơđơ̆ng păng jang tŏk tơ̆ tơring; hơnơ̆ng năng Ấn Độ jĭ 1 lơ̆m dôm teh đak jang hơdoi gĭt kăl, tơgŭm ăn Ấn Độ hơnơ̆ng tưk tơiung hơnăp jang roi tih ƀiơ̆ tơ̆ tơring păng apŭng plenh teh.

Tổng Bí thư, Kơdră teh đak, pơma hơdăh Việt Nam păng Ấn Độ đei tơdrong pơvei ‘lơ̆ng hơiă đơ̆ng sơ̆, lui băl găh chinh trĭ; tơdrong 2 păh drơ̆ng nơ̆r hơtŏk tơdrong pơvei jing Jang hơdoi gĭt kăl, tôm tơdrong ‘nŏh tôch kăp gĭt, vang hơmet kơjăp đon lui chinh trĭ păng pơih đei tơdrong ‘lơ̆ng vă jang hơdoi roi jrŭ xă lơ̆m rim tơdrong; athei 2 păh hơnơ̆ng hơtŏk loi dơ̆ng tơdrong pơgơ̆r ăn khul jang kơpal tơƀâp, pơma nuh, tưk tơiung tơdrong tĕch mơdro hơdoi, tơmât jên jang; pơih xă tơdrong jang hơdoi găh khoa hŏk, kơmăy kơmŏk, hơtŏk tơdrong pơvei ăn kon pơlei đơ̆ng 2 teh đak.