Tơ̆ Hop akŏm, dôm bơngai tang măt mơ̆ng nơ̆r tơroi păng pơma nuh găh tơdrong jang mŭk drăm, tơpôl khei 6 păng 6 khei blŭng sơnăm 2026; tơdrong tơlĕch jên jang đơ̆ng teh đak, bơ̆ jang Tơdrong jang tơm kơteh đak, hơlen năng tơdrong thu mong, tơlĕch jên jang kơ teh đak 6 khei blŭng sơnăm 2026; găh tơdrong pơgơ̆r bơ̆ jang đơ̆ng Khul kơdră teh đak, Thủ tướng teh đak khei 6 păng 6 khei blŭng sơnăm; Tơdrong jang tơm athei pơgơ̆r bơ̆ jang tơ̆ hơnăp kơnh; găh tơdrong hơmet ăn sơnăm hŏk 'nao 2026-2027 păng 1,2 tơdrong nai hai. 6 khei blŭng sơnăm 2026, tơdrong jang mŭk drăm lơ̆m teh đak sơđơ̆ng 'lơ̆ng. Tơdrong jang tŏk pran 'lơ̆ng. GDP jăl khei mă II pơhlom tŏk 8,39%, hơnhăk kơsô̆ jang tŏk lơ̆m 6 khei truh 8,18%.

Pơma tơ̆ hop akŏm, Tổng Bí thư, Kơdră teh đak akhan, teh đak oei dơ̆ng tơ̆ hơnăp tơdrong 'lơ̆ng vă jang tŏk, mă lei tơdrong 'lơ̆ng lăp jing đei tơpă mưh teh đak adrin tôch ai, đei đon tơchĕng trŏ, trong pơgơ̆r jang hiôk 'lơ̆ng, khul kơdră chĕp kơ̆l pơgơ̆r bơ̆ jang đei yoa, kăn ƀô̆ pơ̆n tơchĕng, pơ̆n jang, anih tĕch mơdro roi pran, kon pơlei mĭnh jơhngâm, yoa thoi noh, jơhngâm đon atŭm 'nŏh jĭ athei adrin tôch ai, bơ̆ jang mă pran hlŏh dơ̆ng, pơgơ̆r jang khŏm đei; adrin jang đang 'lơ̆ng hlŏh rim tơdrong hơgăt lơ̆m sơnăm 2026, pơjing anih dơ̆ng kơjăp ăn sơnăm 2027 păng tôch chăl jang tŏk 'nao kơ teh đak.