Tơdrong jang vă dar deh pơm hơmet ming anih Hoàng thành Thăng Long, atŭm hăm 'nŏh chĕp vei păng tưk tơiung dôm kơjă kăp gĭt lơ̆m jơhnơr arih, jŏh ayŏ kơ dŏ xoang đơ̆ng Anih gru groa gĭt kăl kơ apŭng plenh teh. Hnam soi Kính Thiên sơ̆ jĭ anih tôch sĭt tơ̆ Cấm thành Thăng Long. 'Nâ̆u jĭ anih chĕp kơ̆l pơgơ̆r tơm dơnơm, kŭm jing anih đa pơgơ̆r lêh đơ̆ng đe Ƀok pơtao, anĭh hơkŭm, pơm lêh tĭh păng sơng bơngai tang măt, jĭ anĭh tơƀôh hơdăh hlŏh tơdrong chĕp kơ̆l pơgơ̆r tĕh đak chăl Đại Việt đơ̆ng anglŏ 15 - 18.

Tơdrong hơmet ming đei jang kiơ̆ 15 sơnăm tơchĕng hơlen đơ̆ng lơ anih jang găh chăl so sơ̆, tơmam đơ̆ng kră sơ̆, hnam oei păng dôm tơmam so, kŭm hăm nơ̆r roi tơƀôh đơ̆ng UNESCO păng ICOMOS. Pơlei tơm Hà Nội athei, mưh bơ̆ jang vei lăng, pơm hơmet ming ‘nŏh athei ‘moi kiơ̆ khoa hŏk, năng kăl rim tơdrong so sơ̆ păng pơm, vei lăng thoi dôm anih so hlôi đei chă ƀô̆h. Tơdrong jang đei năng jĭ hơyak blŭng a gĭt kăl lơ̆m đon pơhnŏng hơmet ming anih gru groa Hoàng thành Thăng Long truh sơnăm 2035, vang tơgop hơnhăk dôm kơjă kăp gĭt truh jê̆ ƀiơ̆ hăm kon pơlei păng tơmoi chă tơmang lăng.