Pơgê 4/6, tơ̆ Hơnih Hop akŏm kơ Teh đak (Hà Nội), Hop akŏm XIV Công đoàn Việt Nam jăl jang 2026-2031 pơgơ̆r tih hăm tơdrong vang truh akŏm đơ̆ng Tổng Bí thư, Kơdră teh đak Tô Lâm kŭm hăm lơ kơdră chĕp kơ̆l, sơ̆ pơm kơdră chĕp kơ̆l Đảng, teh đak. Hăm trong jang tơm “Tơgoăt pôm ƀơ̆r đon - Kon pơlei pơm tơm - Tơpăt - Tơplih ‘nao - Hơtŏk tơiung”, Hop akŏm âu akŏm pơtôch tơdrong bơ̆jang kiơ̆ Tơdrong tơchơ̆t Hop akŏm XIII Công đoàn Việt Nam jăl jang 2023-2026; hơlen lăng tơdrong jang Khŭl chĕp kơ̆l pơgơ̆r Tổng Liên đoàn Lao động Việt Nam jăl XIII; băt hơdăh tơdrong tơm, hơnăp jang păng dôm tơdrong jang tŏk ăn jăl jang ‘nao.

Pơma pơgơ̆r, Tổng Bí thư, Kơdră teh đak pơma hơdăh khŭl jang kŏng nhơ̆n ling lang jing bơngai jang hơdrol kơ kach mang Việt Nam, kơtă pơm đei mŭk tơmam păng pơjing mŭk drăm teh đak. Hơdai hăm athei anih jang Công đoàn tơplih ‘nao hrĕnh hloh, jrŭ hloh păng tơpă hloh; akŏm bơ̆jang kiơ̆ 6 hơnăp jang tơm, pơjing khŭl jang kŏng nhơ̆n ‘nao, tih pran, hơtŏk ‘lơ̆ng tơdrong gơh hơgei, băt yua kơmăy kơsô̆ păng tơdrong pơm lăp ăn bơngai jang lơ̆m khei ‘năr hơtŏk tơiung.