Tơ̆ âu, Tổng Bí thư păng Khul jang truh sŏh plang nhang ƀlŏk hơdơ̆r kơ đe Linh lôch tang ăn teh đak ƀât Rup man kơ đe linh lôch tang ăn teh đak, năm ngôi, hơpăh tơmam ăn kăn ƀô̆, linh tơ̆ Hnam kơmăy Rada 27 păng pơgơ̆r jơ bơ̆ jang hăm Anih chĕp kơ̆l Đảng apŭng Bạch Long Vĩ.

Pơma hơdăh achon Bạch Long Vĩ jĭ anih pơvih pơvăn gĭt kăl, jĭ 1 kơđông linh vei lăng sơđơ̆ng tơ̆ đak dơsĭ, mă loi jĭ tơ̆ tơring đak dơsĭ Bạch Long Vĩ, jĭ 1 lơ̆m dôm tơring chă yâu ka hơdang tih tơ̆ Ving Bắc Bộ, đei lơ tơmam, cham char ‘lơ̆ng rŏ, Tổng Bí thư akhan, đơ̆ng tơdỏng ‘lơ̆ng tơ̆ Bạch Long Vĩ, plt păng apŭng athei tơchĕng hơlen tơlĕch trong jang mă hơdăh vă apŭng achon kông jing anih pơvih pơvăn ‘lơ̆ng ăn tơdrong jang ka hơdang, atŏk tơiung tơdrong rong ka hơdang păng sơng tơmoi truh tơmang lăng, nehn tơdỏng tơchơ̆t đơ̆ng Anih tơm Chinh trĭ tơlĕch. 

Găh tơdrong jang tơ̆ hơnăp kơnh, Tổng Bí thư athei, jăh chĕng hơmet mă ‘lơ̆ng tơring jang mŭk drăm păng tơring hmă vă đei trong tơmât jên jang hrơ̆ch ‘lơ̆ng găh anih jang, unh hơyuh, trong nơnăm, kơmăy roi tơbăt, anih pơyoa ăn tơdrong jang ka, tang găn tŏ ‘mi kial tơplih, đak dơsĭ tŏk, anih kơ ‘nơp veh ver kơ ‘mi kial hơbŭt, vei lăng ‘lơ̆ng ăn tơdrong jang tŏk mŭk drăm, tơpôl, tơklep hăm vei kơjăp tơdrong sơđơ̆ng teh đak.