VOV4.Bahnar - Tơ băt 77 sơ năm Năr Tơ ring Pơ băh iung tơ blăh (23/9/1945 - 23/9/2022) – khei ‘năr gĭt kăl lơ̆m jơ hnơr arih kơ tang nuih mơng kơ hơ drĕch hơ drung, pơ gê 23/9, tơ̆ pơ lei tơm (plt) Hồ Chí Minh, Tổng Bí thư Nguyễn Phú Trọng pơ gơ̆r jơ bơ̆ jang hăm Khul kơ dră chĕp kơ̆l Đảng ƀô̆ păng kăn ƀô̆ tơm kơ plt găh bơ̆ jang kiơ̆ tơ drong Tơ chơ̆t đơ̆ng Hop akŏm mă 13 kơ Đảng păng Tơ drong tơ chơ̆t đơ̆ng Hop akŏm mă 11 Đảng ƀô̆ plt đơ̆ng blŭng jăl jang truh dang ei.

Tổng Bí thư Nguyễn Phú Trọng păng dôm bơ ngai tang măt

Tổng Bí thư Nguyễn Phú Trọng tơ chĕng 'lơ̆ng dôm tơ drong adrin păng jang đei, dôm tơ drong jơ nei mă Đảng ƀô̆, khŭl kơ dră pơ gơ̆r păng kon pơ lei plt Hồ Chí Minh hlôi iŏk đei khei 'năr âu ki, mă đơ̆ng thoi nŏh ră, Tổng Bí thư oei pơ ma tơ ƀôh lơ tơ drong tam mă pran 'lơ̆ng đơ̆ng plt hai.

Tổng Bí thư Nguyễn Phú Trọng akhan: Tơ̆ hơ năp kơnh, plt athei hơ tŏk hlŏh dơ̆ng tơ drong hơ met ming trong jang mŭk drăm đơ̆ng plt tơ klep hăm tơ drong tơ plih 'nao trong jang tŏk; akŏm jơ hngâm pơ 'nhŏ ăn dôm tơ drong jang tŏk gĭt kăl, hơ met pơ 'lơ̆ng dôm tơ drong tơ hlăk, găn trong găh tơ drong pơ gơ̆r jang, anih jang trong nơ năm păng khul bơ ngai jang hrei ‘nâu, tưk tơ iung hlŏh dơ̆ng tơ drong chĕp kơ̆l pơ gơ̆r, jơ hngâm pran vă jang tŏk pran hlŏh hăm tơ ring Đông Nam Bộ, tơ găl hăm hơ năn "Tĕh mam pơ sei, pơ lei tơm kong", jĭ "Hu măih tơ̆ tơ ring Găh Hơ lĕch", jĭ "Đon lui 'mêm kơ eng păng hưch hanh kơ tĕh đak”.

Dơ̆ng: Tơ blơ̆