VOV4.Bahnar - Pơgê năr 29/8, tơ̆ Hơnĭh bơ̆ jang Trung ương Đảng, Tổng Bí thư Nguyễn Phú Trọng hlôi đei jơ tơ ƀơ̆p mŭh măt 80 ‘nu kơdră tang măt vang năm Hop akŏm kơdră tang măt lơ̆m tĕh đak ‘măng mă 11 Jơnŭm chư pơglang ƀrê Việt Nam jăl jang 2022-2027.

Rup jơ tơƀơ̆p mŭh măt

Hăm hơnăp jang Kơdră chĕp pơgơ̆r Jơnŭm chư pơglang ƀrê Việt Nam jăl X, Tổng Bí thư Nguyễn Phú Trọng pơma tơbăt jơhngơ̆m đon chơt hơ iă đei tơƀơ̆p khŭl kơdră tang măt găh Pơm lêh hop akŏm, adoi pơtrŭh ăn đĭ đăng rim kơdră tang măt vang năm Pơm lêh hop akom adoi nhen pơ đĭ lơ̆m Jơnum Chư pơglang ƀrê lơ̆m tĕh đak hăm jơhngơ̆m đon ‘lơ̆ng hơ iă hlĭh, nơ̆r apĭnh jet gia pơma dơnŭh tơpăt păng hmach ăn đei tơdrong ‘lơ̆ng hơ iă hlŏh. Tổng Bí thư Nguyễn Phú Trọng sơkơ̆t hơdăh, ‘mêm mơnat, tơgŭm dĭh băl ‘nŏh mĭnh tơdrong ‘lơ̆ng hơ iă, mĭnh tơdrong joăt joe gĭt kăl kơ Hơdrĕch hơdrung bơ̆n, tơbăt hơdăh jơhngơ̆m đon ‘mêm kơ eng dĭh băl păng vei lăng năng tông kon bơngai; jing kơsô̆, ‘klong pơtŏ ăn tơdrong gơ̆h hơgei păng tơdrong hlô̆h vao kơ tơpôl. Tổng Bí thư Nguyễn Phú Trọng athei, jăl jang trŭh au kơnh rim Khul lơ̆m tĕh đak kăl hơnơ̆ng lăng ba kơ jăp bơ̆ jang tơ iung pơjing khŭl jang păng kang ƀô̆, rim bơngai lơ̆m Khŭl; rim kang ƀô̆, bơngai lơ̆m khŭl hơdrin hlŏh dơ̆ng bơ̆ jang, đei jơhngơ̆m đon ‘mêm kơ eng, hơnơ̆ng iung jang kiơ̆ hơnăp jang păng tơdrong đei yom kiơ̆ kơtang kơ Khŭl roi năr roi kơtang.

Tơblơ̆ nơ̆r: Amazưt