VOV4.Bahnar – Pơ gê 22/3, Tổng Bí thư Nguyễn Phú Trọng chĕp kơ̆l khul jang đơ̆ng Trung ương năm hơ pong păng bơ̆ jang hăm kơ dră chĕp kơ̆l dêh char Hoà Bình găh tơ drong jang đei đơ̆ng blŭng jăl jang 2020 - 2025 truh dang ei; tơ drong vă jang lơ̆m sơ năm 2022.

Tổng Bí thư Nguyễn Phú Trọng kŭm hăm dôm bơ ngai tang măt lơ̆m jơ bơ̆ jang hăm kơ dră chĕp kơ̆l dêh char

Tổng Bí thư Nguyễn Phú Trọng kŭm hăm khul jang năm ngôi tơ̆ Công ty TNHH tơ chĕng hơ len ki thuơ̆t R Việt Nam – Anih jang FDI Nhật Bản tơ mât jên jang xa tơ̆ dêh char Hoà Bình. Anih jang đei jên jang truh 11 triu đô la Mi hăm vă jê̆ 700 ‘nu công nhân, jên khei jô̆ păh lăp 8 triu 1 ‘nu 1 khei, nôp jên ăn tĕh đak truh 10 ti 1 sơ năm. Công ty juăt pơm tơ lĕch thấu kính, kơ loăi thấu kính ‘lơ̆ng âu hơ nơ̆ng tĕch ăn Nhật Bản, Malaisia, Hồng Kông (Trung Quốc) păng Đức.

Đơ̆ng rŏng kơ ‘nŏh, pơ gơ̆r jơ bơ̆ jang hăm kơ dră chĕp kơ̆l dêh char, Tổng Bí thư Nguyễn Phú Trọng tơ tă, tơ drong tôch gĭt kăl hrei ‘nâu đơ̆ng tơ ring ‘nŏh tang găn jĭ Covid-19 păng jang tơ iung ming dơ̆ng mŭk drăm. Tổng Bí thư Nguyễn Phú Trọng oei athei, Hoà Bình hơ met pơ ‘lơ̆ng anih tơ mât jên jang xa, tĕch mơ dro, hơ tŏk kơ sư̆k jang, pơm đei tơ mam ‘lơ̆ng, kĕ pơ jei hăm đe nai vă akŏm jơ hngâm, jên hu, tơ mam pơ ‘nhŏ ăn tơ drong jang tŏk.

Dơ̆ng: Tơ blơ̆