VOV4.Bahnar - Pơgê năr 24/1, Tổng Bí thư Nguyễn Phú Trọng chĕp kơl khŭl bơ̆ jang kơ Trung ương hlôi năm ngôi, hmach Têt ăn Dơnŏ anĭh Đảng, Dơnŏ anĭh chĕp pơgơ̆r păng Kon pơlei dêh char Bắc Ninh.

Tổng Bí thư Nguyễn Phú Trọng iung pơma tơ̆ jơ bơ̆ jang hăm Khŭl kơdră chĕp pơgơ̆r Đảng dêh char Bắc Ninh

Iung pơma tơ̆ jơ bơ̆ jang, Tổng Bí thư Nguyễn Phú Trọng athei, Bắc Ninh kăl hơnơ̆ng akŏm pơrô̆ pơrôp kơtang jang kiơ̆ Tơdrong tơchơ̆t Hop akŏm mă XIII kơ Đảng păng Tơdrong tơdrong tơchơ̆t pơm lêh Hop akŏm mă XX kơ Dơnŏ anĭh Đảng dêh char, pơm ăn Tơdrong tơchơ̆t au mơ̆t lơ̆m kơ̆l ‘ngok lơ̆m Đảng, lơ̆m kon pơlei, pơm ăn rim bơngai băt hơdăh tôm tong tơdrong rơvơn kăl băt hơdăh, jang kiơ̆; dôm tơdrong tơnap tap, tơdrong long kăl hơdrin yak hlŏh. Ư̆h kơ gơ̆h pơhơi, hiôk lăp hăm tơdrong iok đei. Dơnŏ anĭh Đảng dêh char kăl tĕnh koăng dăr lăng dôm tơdrong hlôi jang đang, tơdrong jang tim mă keh đang, vă đơ̆ng nŏh, hơmet pơ ‘lơ̆ng trong jang, tơdrong jang, hăm kơrŭn đĭ jơhngơ̆m jang kiơ̆ kơtang hlŏh dơ̆ng.

Tơblơ̆ nơ̆r: Amazưt